شىمكەنتتىك ۇ و س ارداگەرى ايتجان بەكنازاروۆ 12 رەت اجالدان امان قالعان
بۇگىندە 94 كە كەلگەن قاريا «وق پەن وتتىڭ ورتاسىنان جاراقات الماي، ءدىن امان قايتتىم»، - دەيدى.
جەڭىستەن كەيىن بار عۇمىرىن سوت سالاسىنا ارناعان ارداگەر فەميدا قىزمەتكەرلەرى وتكىزگەن «ۇرپاقتار ساباقتاستىعى» اتتى باسقوسۋدا جاس سۋديالار مەن كوپشىلىككە سۇراپىل سوعىس جىلدارى باستان كەشكەن قيىندىعى مەن وتان ءۇشىن وپات بولعان قارۋلاس دوستارىنىڭ ەرلىگى جايلى ايتىپ بەردى، دەپ حابارلايدى 24.kz.
30 جىلدان استام سوت سالاسىندا ەڭبەك ەتكەن قۇرمەتتى سۋديا «تۇعىرى بيىك تاۋەلسىزدىك ۇعىمىن ۇلىقتاۋ كەرەك»، - دەيدى. 19 جاسىندا قان مايدانعا ءوزى سۇرانىپ اتتانعان بوزبالا تاراز قالاسىنداعى №105 قازاق ۇلتتىق اتتى اسكەر ديۆيزياسىنىڭ قۇرامىندا بولعان. بايلانىسشى مەن بارلاۋشى مىندەتىن اتقارعان ارداگەر ستالينگراد ۇرىسىنا دا قاتىسقان. بىردە جاۋدىڭ سۇرمەرگەنى اتقان وق بەلىنە بايلاعان سۋ قۇتىسىنا ءتيىپ، جان ساقتاپتى. قىراعى جاۋىنگەر وزىنە تونگەن قاۋىپ-قاتەرگە قاراماستان، تالاي قارۋلاس دوستارىن اجالدان امان الىپ قالعان ەكەن.
«مەن سول ساقتاۋشىسى بار ادامنىڭ ءبىرىمىن دەپ ويلايمىن. نەگە؟ 12 رەت تۋرا كەلگەن اجالدان امان قالىپپىن. مولداۆيادا 4 اي قورعانىستا تۇردىق. بوتتا دەگەن ۇلكەن كول بار. ارعى جاعىنان بەرگى بەتكە وق جەتپەيدى. سونىڭ بەرگى جاعاسىنداعى قىردا، باقىلاۋ پۋنكتىندە نەمىستى قاراپ وتىرامىن. جەردى تەرەڭ ەتىپ قازىپ سنايپەر وتىرعانىن كورىپ قالدىم. بىزدىكىلەر سۋعا بارادى. سوسىن ايقايلادىم، «سۋعا بارماڭدار، مەرگەن وتىر» دەپ. ءسويتىپ مەن قانشا سولداتتى امان الىپ قالدىم، - دەپ ەسكە الادى ۇلى وتان سوعىسىنىڭ ارداگەرى ايتجان بەكنازاروۆ.
