الماتىدا 12 مىڭ شارشى مەتر جەر شاعىن جانە ورتا بيزنەسكە بەرىلەدى - فوتو
بۇل تۋرالى بۇگىن الماتىدا سالىنىپ جاتقان 12 مىڭ ورىندىق مۇزا سارايى، 5 مىڭ ورىندىق اتلەتيكالىق اۋىل جانە 3 مىڭ ورىندىق مۇز ارەناسىنىڭ بيزنەس- مۇمكىندىگىن تانىستىرۋ شاراسى بارىسىندا «قازاقپارات» تىلشىسىنە «الماتى ق. سپورت قۇرىلىمدارى ديرەكسياسىنىڭ» ديرەكتورى سەرگەي اپەنكو ءمالىم ەتتى.
«ءبىز بۇگىن الەۋەتتى دەگەن بيزنەس سەرىكتەستەردى شاقىرىپ، ولارعا مىنا سپورت نىساندارىنىڭ الەۋەتى، وسىندا وتەتىن شارالار جانە سول شارالارعا كەلەتىن تۇرعىندار جايىندا اڭگىمەلەدىك. ارينە، ءبىز بارلىق ۇسىنىستارعا اشىقپىز. ءبىراق، بىزگە نارىقتا ءوز ۇستانىمى بار، تاجىريبەلى كاسىپكەرلەر كەرەك. ويتكەنى، بۇل حالىقارالىق دەڭگەيدەگى نىساندار. بۇل جەردە مەيرامحانا، كافە، ازىق-تۇلىك، سپورت كيىمدەرى جانە كادەسىيلار دۇكەنىن، سونداي-اق سپا-سالوندار، كوسمەتولوگيا، سپورت كيىمدەرىن پروكاتقا بەرۋ، اياق-كيىم جوندەۋ جانە باسقا دا كوپتەگەن ينفراقۇرىلىمداردى اشۋعا بولادى.
جالپى، 12 مىڭ ورىندىق مۇز ايدىنى مەن 3 مىڭ ورىندىق مۇز ارەناسىندا 12 مىڭ شارشى مەتر جەر تازا وڭدەلگەن كۇيىندە تومەندەتىلگەن باعامەن شاعىن جانە ورتا بيزنەس سۋبەكتىلەرىنە جالعا بەرىلەدى»، - دەدى س. اپەنكو.
