قىتايدا كوشكىننىڭ ورىن الۋىنا قاتىسى بولۋى مۇمكىن دەگەن 12 ادام تۇتقىندالدى
بۇل تۋرالى قالالىق پوليتسيا باسقارماسىنىڭ Weibo (Twitter- گە ۇقساس) الەۋمەتتىك جەلىسىندەگى پاراقشاسىندا دۇيسەنبى كۇنى جاريا ەتىلگەن حابارلامادا جازىلدى.
ازىرگە تۇتقىندالعانداردىڭ جەكە مالىمەتتەرى تاراتىلعان جوق. قۇقىق قورعاۋ ورگاندارىنىڭ حابارلاۋىنشا، تۇتقىندالعانداردىڭ Shenzhen Yixianglong جانە باسقا دا كومپانيالارعا قاتىسى بار كورىنەدى. ءبىر نۇسقا بويىنشا، اتالعان كومپانيانىڭ زاڭسىز قوقىس الاڭىنا جينالعان قالدىقتار قاتتى كوشكىننىڭ ورىن الۋىنا سەبەپ بولعان بولۋى مۇمكىن.
بۇدان بۇرىن Shenzhen Yixianglong كومپانياسى باسشىسىنىڭ ورىنباسارى يۋي شەنليدىڭ تۇتقىندالعانى تۋرالى حابارلانعان ەدى. توپىراق كوشكىنى 20 -جەلتوقساندا Liuxi ونەركاسىپ پاركىندە بولدى. شىنجىن قالاسىنىڭ ۆيتسە-مەرى ليۋ سينشەننىڭ ايتۋىنشا، كوشكەن توپىراق 380 مىڭ شارشى مەتر اۋماقتى العان، لاي باتپاقتىڭ قالىڭدىعى كەيبىر جەرلەردە 10 مەترگە دەيىن جەتىپتى. كوشكىننىڭ سالدارىنان 33 عيمارات قيراعان نەمەسە زارداپ شەككەن. بۇگىنگى كۇنى اپات ايماعىندا ءىز- ءتۇسسىز كەتكەن 70 ادامدى ىزدەستىرۋ جۇمىستارى جالعاسۋدا، دەپ حابارلايدى ت ا س س اگەنتتىگى.
