اۆستريا مەن قازاقستان اراسىنداعى ساۋدا اينالىمى 12 ەسەگە ارتقان - م. پىشەمبايەۆ
بۇل تۋرالى بۇگىن ۆەنا قالاسىنداعى اۆستريا ەكونوميكاسىنىڭ فەدەرالدى پالاتاسىندا وتكەن اۆستريا ماشينا قۇراستىرۋشىلارىنىڭ فورۋمىندا قازاقستان ماشينا قۇراستىرۋشىلار وداعىنىڭ ءتوراعاسى مەيرام پىشەمبايەۆ ءمالىم ەتتى.
«ەكىجاقتى ىنتىماقتاستىق ورناعاننان بەرى اۆستريا مەن قازاقستان اراسىنداعى تاۋاراينالىم 12 ەسەگە ارتقان. بولاشاقتا دا وسى ءوسۋ ءۇردىسى جالعاسا بەرەدى. اۆستريا ت م د قۇرامىنا كىرمەيتىن ەلدەر اراسىندا قازاقستاننىڭ ءتورتىنشى ساۋدا ارىپتەسى، ال تاۋار كولەمى بويىنشا ەۋرووداق ەلدەرى اراسىندا ءبىزدىڭ ءۇشىنشى سەرىكتەسىمىز بولىپ وتىر. 2014-جىلدىڭ ناتيجەسىنە قاراساق، ەكىجاقتى ساۋدا اينالىم كولەمى 3,1 ميللياد ەۋرونى قۇراعان. قازاقستان مەن اۆستريا اراسىنداعى ىنتىماقتاستىق ەكى ەلدىڭ ەكونوميكاسى ءۇشىن وتە قاجەتتى»، - دەدى فورۋم بارىسىندا قازاقستان ماشينا قۇراستىرۋشىلار وداعىنىڭ ءتوراعاسى مەيرام پىشەمبايەۆ.
م. پىشەمبايەۆتىڭ ايتۋىنشا، قازاقستان مەن اۆستريا اراسىنداعى ەكونوميكالىق ىنتىماقتاستىقتىڭ باسىم باعىتى - ول ماشينا قۇرىلىس سالاسى مەن شاعىن جانە ورتا بيزنەسكە ينۆەستيتسيا تارتۋ سالاسى.
ەستەرىڭىزگە سالا كەتەيىك، شەتەلدىك ينۆەستيتسيا تارتۋ ءۇشىن قازاقستان 10 ارنايى ەكونوميكالىق ايماق پەن 2 يندۋستريالدى ايماق قۇرعان بولاتىن. قازىر قازاقستاندا اۆستريا تاراپىمەن بىرلەسكەن 140-تان استام كاسىپورىن تىركەلگەن.
