تۇركيادا وتەتىن حالقارالىق ءسامميتتىڭ قاۋىپسىزدىگىن 12 مىڭ پوليتسيا قاداعالاماق
ءتارتىپ ساقشىلارى اسىرەسە الەمدىك ماڭىزى زور جيىنعا قارسىلىق بىلدىرۋگە كەلەتىن نارازى توپتاردى ەرەكشە باقىلاۋعا الماق.
ويتكەنى كۇنى كەشە انتاليانىڭ «ەڭبەك جانە دەموكراتيالىق كۇشتەر» قوعامدىق ۇيىمى ورتالىق الاڭدا كەڭ اۋقىمدى شەرۋ وتكىزۋگە قالا باسشىلىعىنان رۇقسات سۇرادى. ال سامميتكە ساناۋلى كۇن قالعاندا تۇركيا جاستار وداعى ا ق ش- تىڭ انكاراداعى ەلشىلىگى مەن ىستامبۇل قالاسىنداعى باس كونسۋلدىعىنىڭ الدىندا نارازىلىق شاراسىن ۇيىمداستىردى.
ۇكىمەتتىك ەمەس ۇيىمنىڭ بەلسەندىلەرى اق ءۇي باسشىسى باراك وبامانى الەمدەگى تىنىشتىقتىڭ شىرقىن بۇزدى دەپ ايىپتاپ، ونىڭ تاياۋ شىعىس ايماعىندا جۇرگىزىپ وتىرعان سىرتقى ساياساتىن قاتاڭ سىنعا الدى، دەپ حابارلايدى ارنامىزدىڭ وسى ەلدەگى مەنشىكتى ءتىلشىسى ەرجان ءجۇنىس.
يبراگيم كالىن، تۇركيا رەسپۋبليكاسى پرەزيدەنتىنىڭ باسپا ءسوز حاتشىسى:
- دۇنيە ءجۇزىنىڭ جەتەكشى 20 ەلدىڭ مەملەكەت باسشىلارى مەن مارتەبەلى مەيماندار قاتىساتىن القالى جيىننىڭ قاۋىپسىزدىك ماسەلەسىنە الاڭدايتىنداي نەگىز جوق. ەلىمىزدىڭ ىشكى ىستەر مينيسترلىگى مەن جاۋاپتى مەكەمەلەر بۇل اۋقىمدى شاراعا تىڭعىلىقتى دايىندالدى. «ۇلكەن جيىرمالىق» سامميتى بولاتىن بەلەك قالاسى قاۋىپسىزدىك كۇشتەرى تاراپىنان ءجىتى قاداعالانادى. كيبەر شابۋىلىنا قارسى الدىنالۋ جۇمىستارى دا قولعا الىنىپ وتىر.
www.24.kz
