قازاقستاندىق 12 كۋرسانت فينليانديادا ۇشقىش ديپلومىن الدى
ءىس- شارادا ف ر س ءى م وكىلدەرى، قازاقستان رەسپۋبليكاسىنىڭ فينليانديا رەسپۋبليكاسىنداعى ەلشىلىگىنىڭ ديپلوماتتارى، ق ر ازاماتتىق اۆياتسيا اكادەمياسى مەن «Patria» ۇشقىشتار مەكتەبىنىڭ باسشىلارى قاتىستى، دەپ حابارلايدى ق ر س ءى م باسپا ءسوز قىزمەتى.
ەلشى عالىمجان قويشىبايەۆ قازاقستاننىڭ ازاماتتىق اۆياتسيا اكادەمياسىنىڭ تۇلەكتەرىن قۇتتىقتاپ، ولارعا كاسىبي سالاسىنداعى قىزمەتىنە تابىستار تىلەدى. ول قازاقستاندىق ۇشقىشتاردىڭ فينليانديادا وقۋى فينليانديانىڭ پرەزيدەنتى ساۋلي نيينيستنىڭ 2013 - جىلى قازاقستانعا جاساعان مەملەكەتتىك ساپارىنىڭ ناتيجەسى بويىنشا جوعارى دەڭگەيدەگى ۋاعدالاستىقتاردىڭ تاجىريبەلىك قورىتىندىسى بولعانىن ەسكە سالدى. وسى ۋاقىت ىشىندە قازاقستاننىڭ 12 ستۋدەنتى حەلسينكيدە ۇشقىشتار مەكتەبىندە ەكى جىلدىق ۇشۋ دايىندىعىنان ءوتتى. قازاقستاندىق ديپلومات ق ر اۆياتسيا سالاسى ءۇشىن جوعارى بىلىكتى ماماندار دايىنداۋعا قوسقان ۇلەسى ءۇشىن «Patria» ۇشقىشتار مەكتەبىنىڭ باسشىلىعىنا العىسىن ءبىلدىردى.
سىرتقى ساۋدا جانە دامۋ ءمينيسترى لەنيتا تويۆاككا اتىنان ف ر س ءى م وكىلى پيايۆي پەلتوكوسكي ءبىلىم سالاسىندا قازاقستانمەن ىنتىماقتاستىقتى كەڭەيتۋگە فينليانديانىڭ قىزىعۋشىلىعىن ءبىلدىردى. ءبىلىم بەرۋ سالاسىندا «Patria» مەكتەبىنىڭ وقۋ باعدارلامالارى ەكى ەل اراسىنداعى جەمىستى ىنتىماقتاستىقتىڭ ايقىن ۇلگىسى بولىپ تابىلاتىنىن ايتتى.
Patria Pilot Training كومپانياسىنىڭ باس ديرەكتورى ميككو پارونەن قازاقستانمەن ءوزارا ارەكەتتەسۋدىڭ ستراتەگيالىق سيپاتىن اتاپ ءوتىپ، كادرلاردى دايىنداۋ سالاسىندا ىنتىماقتاستىقتى ودان ءارى جالعاستىرۋعا تەرەڭ قىزىعۋشىلىق تانىتاتىندىقتارىن ءبىلدىردى.
