بالا اقىن جامبىل دۇيسەنوۆتىڭ 12 جاسىندا ءۇشىنشى كىتابى جارىق كورمەك - فوتو
ولەڭدەرىن وقىپ تانىسقان جۇرتتىڭ كەيبىرى تاڭعالسا، كەيبىرى ءتىل- كوزدەن امان بولسىن دەپ ىشتەي ءسۇيسىندى. ونىڭ ەسىمى 2010 -جىلدارى ەلىمىزدە دۇرىلدەپ تۇرعان ەدى. ارادا بىرنەشە جىلدار ءوتتى؟ سول جامبىل اقىن قايدا قازىر؟ نەمەن اينالىسۋدا؟ وسى سۇراقتارعا جاۋاپ ىزدەۋ ماقساتىمەن ءبىز ونىڭ اناسى كامشات يبرايموۆامەن سۇحبات قۇردىق.
- كامشات، ۇلىڭىز جامبىل العاشقى ولەڭدەرىن قاي كەزدەن جازا باستادى؟ ونىڭ ەرەكشەلىگىن قالاي بايقادىڭىزدار؟
- بالامنىڭ ءتىلى ءبىر جاسىندا شىقتى. ال ەكىگە تولعاندا 42 ءارىپتىڭ ءبارىن تانىپ الدى. 100 گە دەيىن سانايتىن بولدى. ويىنشىققا ەمەس، قالامعا جاقىن بولاتىن. ال 5 جاسىنان ولەڭ جازا باستادى. العاشقى ولەڭى «اق اجەم» دەپ اتالادى.
- قازىر جامبىل نەشىنشى سىنىپتقا وقيدى؟ وقۋ ۇلگەرىمى قالاي؟ ساباق پەن شىعارماشىلىقتى قاتار الىپ ءجۇرۋ قيىن بولىپ جاتقان جوق پا؟
- جامبىل نەگىزىنەن 6-سىنىپ وقۋى كەرەك ەدى. ءبىر جىلدا 1-2 سىنىپتى ءبىر-اق تاۋىسقاندىقتان قازىر 9-سىنىپتا وقىپ ءجۇر. الماتى قالاسىنداعى باۋىرجان مومىش ۇلى اتىنداعى №131 مەكتەپ- ليتسەيدە وقيدى. ازىرگە ساباعىنا دا، ولەڭ جازۋعا دا ۇلگەرىپ جاتىر.
- قاي پانگە قىزىعۋشىلىعى باسىم؟
- نەگىزى، بارلىق پاندەردى جاقسى وقيدى. بارىنەن دە ۇزدىك باعا الىپ ءجۇر. ءبىراق اقىندىق جولعا بەت بۇرعاننان كەيىن گۋمانيتارلىق سالاعا قىزىعۋشىلىعى باسىم. جامبىل نەگىزىنەن پوەزيانى وقىعاندى ۇناتادى. مۇقاعالي ماقاتايەۆ، تولەگەن ايبەرگەنوۆ. مۇحتار شاحانوۆ پەن جامبىل جابايەۆتىڭ ولەڭدەرىن ءسۇيىپ وقيدى.
- 2011 -جىلى ق ر پرەزيدەنتتىك مادەنيەت ورتالىعىنىڭ كونسەرت زالىندا «تاۋەلسىزدىگىم - تاڭىردەن كەلگەن ءتاتتى سىي» دەپ اتالاتىن جامبىلدىڭ جىر كەشى وتكىزىلگەنى ەسىمىزدە. جانە وسى تاقىرىپپەن كىتابى دا جارىق كوردى. جالپى وسى ۋاقىتقا دەيىن نەشە كىتابى شىققان؟
- «پەرىشتە تىلەك» اتتى تۇڭعىش ولەڭدەر جيناعى 2012 -جىلى جارىق كورگەن. كەيىن «تاۋەلسىزدىگىم - تاڭىردەن كەلگەن ءتاتتى سىي» دەگەن اتاۋمەن تاعى ءبىر كىتابى جارىق كوردى. ءقازىر ءۇشىنشى كىتابى دايىندالىپ جاتىر. سونىمەن بىرگە، اللا قالاسا، جەلتوقسان ايىندا استانا مەن الماتى قالاسىندا شىعارماشىلىق كەشىن وتكىزۋدى جوسپارلاپ وتىرمىز. جامبىلدىڭ العاشقى شىعارماشىلىق كەشى 7 جاسىندا وتكەن. العاشقى جىر كەشى حالىقتىڭ كوڭىلىنەن شىقتى. كەيىن ەلباسىمىز نۇرسۇلتان ءابىش ۇلىنىڭ قابىلداۋىندا بولدىق. سودان بەرى ارادا بەس جىل ءوتتى. حالىق ىزدەپ جاتىر. «جامبىل قايدا؟ نەگە شىقپاي جاتىر؟» دەپ ءجيى سۇرايدى. سوندىقتان حالىقتىڭ الدىنا شىعۋدى جوسپارلادىق. ول دا، ارينە، ۇلكەن دايىندىقتى، ۇلكەن قاراجاتتى قاجەت ەتەدى. سوندىقتان شىعارماشىلىعىنا دەمەۋ كورسەتەتىن ازاماتتار بولسا، قۋانار ەدىك. سەبەبى جامبىلدىڭ بۇل كەشىنىڭ اۋقىمى بەس جىل بۇرىنعى وتكەن كەشكە قاراعاندا ۇلكەن، بىرنەشە بولىمدەرگە بولىنگەن. كوپتەگەن جاڭا ولەڭدەرىنىڭ تۇساۋى كەسىلەدى.
- جامبىلدىڭ ماراپاتتارى تۋرالى ايتىپ وتسەڭىز...
- ءۇش مەدالى بار. ولار جامبىل جابايەۆتىڭ 165 جىلدىعىنا، باۋىرجان مومىش ۇلىنىڭ 100 جىلدىعىنا جانە دىنمۇحامەد قونايەۆتىڭ 100 جىلدىق مەرەيتويىنا وراي بەرىلگەن. رەسپۋبليكالىق، قالالىق بايقاۋلاردان بىرنەشە رەت باس جۇلدە العان. «جىل اقىنى» دەگەن اتاقتى بىرنەشە رەت العان. جالپى وسىنداي جەتىستىكتەرگە قول جەتكىزىپ جاتىرمىز. جامبىل ءالى كىشكەنتاي عوي، ونىڭ جازاتىن جىرى ءالى الدا دەپ ويلايمىن. ۇلىمنىڭ ولەڭدەرى حالىقتىڭ كوڭىلىنەن شىعىپ، رۋحاني ازىق بەرىپ جاتسا، انا ءۇشىن ودان اسقان باقىت جوق دەپ ويلايمىن.
- اڭگىمەڭىزگە راحمەت!
Р.S.
«قازاقپىن مەن، ءپىر تۇتامىن ءتىلىمدى،
قارا نار بوپ كوتەرەمىن جۇگىڭدى.
«قازاعىم» دەپ قارس ايىرىلعان جۇرەگى،
بالا جامبىل مەن بولامىن بۇگىنگى» دەپ جىرلاعان بالا اقىننىڭ قالام تارتىسىنا ەرىكسىز باس يەسىڭ. ونىڭ تۇڭعىش ولەڭدەر جيناعىنىڭ دا قر تۇڭعىش پرەزيدەنتىنىڭ قورىندا تۇساۋى كەسىلۋى دە تەگىننەن- تەگىن بولماسا كەرەك. ەلباسىنىڭ ءوزى: «مەكتەپ تابالدىرىعىن جاڭا اتتاعان قارشاداي بالانىڭ بۇلاي جىرلاۋى ءۇمىتىمىزدى ارتتىرادى، وسىلاي ويلاۋى ءبىزدى قۋانتادى. ءبىز وسىنداي جاستاردى تاربيەلەۋىمىز كەرەك. ەندەشە، ءبىزدىڭ بولاشاعىمىز - جارقىن، كەلەشەگىمىز - كەمەل»، - دەپ سەنىم بىلدىرگەن ەدى.
ءسوز سوڭىندا جامبىل اقىننىڭ ولەڭ بولىپ ورىلگەن ءومىربايانىن نازارلارىڭىزعا ۇسىنامىز.
ەكى مىڭ ءۇشتىڭ ساۋىرىندە اشقان ءومىر ەسىگىن،
سارقىتىمىن جامبىل قارتتىڭ، جامبىل مەنىڭ ەسىمىم.
ىشتە جاتىپ عاشىق بولدىم بابالاردىڭ جىرىنا،
ولەڭ- جىرمەن الديلەدى تۋعان جەرىم، بەسىگىم.
...ەكى جاستا ءارىپ جاتتاپ، اتا- اناما جاعىپپىن،
ءتورت جاسىمدا الىس- جاقىن، جاقسى- جامان تانىپپىن.
التى جاستا اياقتادىم ءبىر مەن ەكى سىنىپتى،
جەتى جاستا سان جۇلدەنى يەلەنگەن الىپپىن.
مەكتەپ بارىپ، سىڭعىرلاتىپ قوڭىراۋدى قاققانمىن.
مەكتەبىمنىڭ نامىسى ءۇشىن تالاي جۇمىس اتقاردىم.
ەسىمىمە لايىق ءبىر ەلدىڭ جۇگىن ارقالار
ۇلى بولىپ ازاماتتىق بورىشىمدى اقتارمىن.
دەگەن سەنىم جەتەلەيدى مەنى العا وي- سانام
ارمانىم كوپ العا قويعان، اسۋلار كوپ اڭساعان،
مەن حالقىمنىڭ قارا نارى قازاق ءۇشىن تۋعانمىن،
ەلىم، جەرىم، ءتىلىم ءۇشىن ولگەنىمشە شارشامان.
كۇرەسەمىن ادامدىق پەن اقيقاتتىڭ جولىندا
مەن تۇلپاردىڭ تۇياعىمىن شاڭ بوراتقان سوڭىندا.
قازاعىمنىڭ قازاق بولىپ جەر بەتىندە قالۋى
ۇلت تىزگىنىن ۇستاپ جۇرگەن ۇلدارىمنىڭ قولىندا.
راس، سولاي، مەن ەلىمنىڭ ەرتەڭىنە جاۋاپتى
تاۋەلسىز ەل تارلاندارى بولۋ كەرەك تالانتتى.
ەركىندىكتى قىرانى مەن ەلىم ءۇشىن تۋعانمىن.
جىرلاپ وتەم تاۋ جىرىممەن قايسار ۇلتىم قازاقتى.
سۇحباتتاسقان گۇلدەن وسپانوۆا
