قازاقستان مۇناي ءوندىرۋدىڭ «ت و پ-12» الەمدىك رەيتينگىندە ۇزاق مەرزىمدە قالۋدى كوزدەيدى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا ەنەرگەتيكا ءبىرىنشى ۆيتسە-ءمينيسترى ۇزاقباي قارابالين ءمالىم ەتتى.
بريفينگ ەلباسى ايقىنداعان «100 قادام» ۇلت جوسپارى اياسىندا جەر قويناۋىن پايدالانۋ سالاسىنداعى ىلگەرى رەفورمالار تاقىرىبىندا وتكەن بولاتىن.
ۆيتسە-ءمينيستردىڭ سوزىنە قاراعاندا، «100 قادام» ۇلت جوسپارى اياسىنداعى رەفورمالار ارقاسىندا ەلىمىزدىڭ گەولوگيالىق بارلاۋ سالالارىنا الدىڭعى قاتارلى تەحنولوگيالار ترانسفەرتى قامتاماسىز ەتىلەدى. مۇناي جانە گازدى بارلاۋ بويىنشا پەرسپەكتيۆالىق باعىتتار اشىلاتىنى كۇتىلەدى. بۇدان بولەك، مۇناي-گاز سالاسىنا، وسى سالامەن بايلانىستى ەكونوميكانىڭ سەرۆيستىك، ينفراقۇرىلىمدىق باعىتتارىنا ينۆەستيتسيالار تارتۋ ءۇشىن جاعىمدى احۋال قالىپتاسپاق.
«ناتيجەسىندە ەلىمىزدە دالەلدەنگەن پايدالى قازبالار قورى ەڭ كەمىندە ەكى ەسەگە ارتادى. ايتا كەتەيىك، بۇل كورسەتكىش بۇگىنگى كۇنى 3,9 ميلليارد تونناعا باعالانىپ وتىر. سونىمەن قاتار، ەكونوميكالىق قيىندىقتار ىقتيمالدىعى جاعدايىندا قاۋىپسىزدىكتى قامتاماسىز ەتۋگە سەپتىگىن تيگىزبەك. مۇناي ءوندىرۋدىڭ جوعارى دەڭگەيىن ۇستاپ تۇرۋعا ۇزاق مەرزىمدى قولداۋلار جاسالادى جانە ءبىز ۇزاق مەرزىمدە الەمدىك رەيتينگتە «ت و پ-12» توبىندا قالۋعا نيەتتىمىز»، - دەدى ۇ. قارابالين.
ونىڭ ايتۋىنشا، بەس رەفورما اياسىندا اتقارىلاتىن شارالار مۇناي-گاز سالاسىنىڭ اشىقتىعىن قامتاماسىز ەتىپ، پايدالى قازبالار كورسەتكىشىنىڭ ارتۋىنا، قازاقستانداعى مۇناي-گاز سالاسىنداعى بارلاۋ، ءوندىرۋ جۇمىستارىنا ينۆەستيتسيالىق كليماتتىڭ ارتۋىنا جول اشادى.
اۆتور: قانات مامەتقازى ۇلى
