وسكەمەندىك 12 جاسار وقۋشى «ەلەكتروندى اقشا» جاسادى
ول بالالارعا ارنالعان بانكومات كارتوچكا ويلاپ تاپتى.
ونىڭ بۇل جاڭالىعىنىڭ پايداسى كوپ كورىنەدى. مىسالى، كەيبىر دۇكەندەر دەنساۋلىعىنا زيان ەكەنىن ەسكەرمەي بالالارعا گازدالعان ءتاتتى سۋسىنداردى ساتا بەرەدى.
ال «ەلەكتروندى اقشانى» اپپاراتقا قوسقاندا، بالالارعا ساتۋعا بولمايتىن زاتتاردىڭ ءتىزىمى شىعادى. ياعني، اقشا بەرىلمەيدى.
بۇل تۋرالى اقپارات بالانىڭ اتا-اناسىنا SMS (كەلتەحات) ارقىلى جىبەرىلەدى ەكەن. ءبىز جاقسى جاڭالىقتىڭ انىق- قانىعىن وقۋشىنىڭ ءوز اۋزىنان ەستۋگە اسىقتىق.
ۇيالى تەلەفونىنا قوڭىراۋ شالساق، اناسى كوتەردى. «بالام ساباققا تەلەفونىن اپارمايدى. ايتۋىنشا، كەدەرگى جاسايدى»، - دەدى. ءبىز گلەبپەن ساباقتان كەيىن سويلەستىك.
ۇلان: گلەب، «ەلەكتروندى اقشانى» قالاي تۇسىنەمىز؟
گ. دانيلوۆ: مەنىڭ اتا- انام «تۇسكى اس ءىش» دەپ تيىن بەرەدى. كەيدە قالتامنان ءتۇسىپ تە قالادى. ساباقتان قايتقان سوڭ، مىندەتتى تۇردە اقشانى قايدا جۇمساعانىمدى سۇرايدى. بىردە انامنىڭ كارتوچكادان اقشا العانىن كورىپ، ويلانىپ قالدىم. نەگە بالالارعا ارنالعان كارتوچكا جوق؟ ءوزىم ىشتەي جوباسىن دايىنداي باستادىم. ويىمدى ۇستازىم ءاليا ءادىلعازينوۆاعا ايتتىم. اپايىم ءسوزىمدى مۇقيات تىڭداپ، قولداي كەتتى.
ۇلان: دەمەك، ۇستازىڭ كومەكتەستى عوي؟
گ. دانيلوۆ: ارينە، ون جاسار بالا مۇندايدى جاساي المايدى عوي.
ۇلان: «ەلەكتروندى اقشانىڭ» قانداي پايداسى بار؟
دانيلوۆ: پايداسى كوپ. مىسالى، كەيبىر دۇكەندەر گازدالعان ءتاتتى سۋسىنداردى ساتا بەرەدى. ال «ەلەكتروندى اقشانى» اپپاراتقا قوسقاندا، بالالارعا ساتۋعا بولمايتىن زاتتاردىڭ ءتىزىمى شىعادى. ياعني، اقشا بەرىلمەيدى.
بۇل تۋرالى اقپارات اتا-اناسىنا SMS ارقىلى جىبەرىلەدى. سوسىن وقۋشىلار اراسىنداعى الىمجەتتىك تە ازايار ەدى. اقشا قالتادا ەمەس، كارتوچكادا ساقتالادى. جازعى دەمالىستا جۇمىس ىستەيتىن بالالارعا دا كومەك. ەڭ باستىسى، اقشانى قالاي جۇمساۋدى، ۇنەمدەۋدى ۇيرەنەسىڭ.
ۇلان: ەگەر قۇپيا ءسوزدى ۇمىتىپ قالسا نەمەسە جوعالتىپ السا شە؟
گ. دانيلوۆ: قۇپيا ءسوزدىڭ ورنىنا ساۋساق ىزدەرىن قويدىق. ەلەكتروندى اقشانى بالانىڭ ءوزى عانا پايدالانادى.
ۇلان: گلەب، جوسپارىڭ جاقسى ەكەن. ال دوستارىڭنىڭ پىكىرى قانداي؟
گ. دانيلوۆ: ءبىز مەكتەپتەگى 700 وقۋشىعا ساۋالناما جۇرگىزدىك. بارلىعى قولدادى.
ۇلان: قانداي جارىستارعا قاتىستىڭ؟
گ. دانيلوۆ: بىرنەشە جارىسقا قاتىسىپ، جۇلدەلى ورىن الدىم. بىلتىر ەلباسى ن. نازاربايەۆ شىعىس قازاقستاندىق دارىندى بالالارمەن كەزدەستى. سوندا وسى «ەلەكتروندى اقشانى» تانىستىردىم. ەلباسى ريزا بولىپ، قولىمنان الدى. العا قويعان ماقساتىمدى سۇرادى. ال مەن ەش قىسىلماستان: «دارىندى بالالارعا جول اشاتىن بيزنەس ورتالىق اشامىن»، - دەدىم.
ۇلان: «ەلەكتروندى اقشانى» قاشان قولدانامىز؟
گ. دانيلوۆ: ءوزىم دە بىلمەيمىن. جارىستارعا قاتىسىپ، قولداۋ تاپسام دا، ەشكىم قىزىعۋشىلىق بىلدىرمەدى. سوندا دا ءۇمىتىمدى ۇزبەيمىن. ءبىر كۇنى ءبىر ەمەس، بىرنەشە بانكتەن ۇسىنىس تۇسەتىنىن بىلەمىن. ازىرگە، ساباعىمدى ۇزدىك وقىپ، وزات وقۋشىلار قاتارىنان قالماۋىم كەرەك.
گۇلفاريدا زەينۋللينا
zhasorken.kz
