الماتىدا كەلىنشەكتەردىڭ 12 پايىزى ونكولوگيالىق تەكسەرۋدەن وتۋدەن قورقادى
بۇگىن الماتىدا وتكەن باسپا ءسوز كونفەرەنسياسى بارىسىندا ماماندار ءسۇت بەزى قاتەرلى ىسىگىنە قاتىستى ايەلدەر اراسىندا جۇرگىزىلگەن ساۋالنامانىڭ ناتيجەسىن جاريالادى.
ساۋالناماعا الماتى قالاسىنىڭ بانك جانە ءبىلىم بەرۋ سالاسىنداعى 1100 ايەل قاتىسقان.
"ءبارىمىز بىرگە قاتەرلى ىسىككە قارسى" قورىنىڭ ديرەكتورى گۇلنار كۋنيروۆانىڭ ايتۋىنشا، كەلىنشەكتەردىڭ 49 پايىزى تەكسەرىلۋگە ۋاقىتىم جوق دەسە، 23 پايىزى ەشنارسە مازالاماعان سوڭ تەكسەرىلۋدىڭ قاجەتتىلىگى شامالى دەپ سانايدى.
ال ولاردىڭ 12 پايىزى ۇرەيلى دياگنوز ەستۋدەن قورقادى.
"وسى ورايدا جۇمىس بەرۋشىلەرگە ءبىر ۇسىنىس ايتقىمىز كەلەدى. ولار دا دەنى ساۋ مامانداردى قابىلداۋعا مۇددەلى. جۇمىس بەرۋشىلەر قول استىنداعى قىزمەتكەرلەردىڭ قارالۋىنا ۋاقىت ءبولۋى كەرەك"، - دەدى گۇلنار كۋنيروۆا.
مامانداردىڭ ايتۋىنشا، جىل سايىن قازاقستاندا 4 مىڭ ايەل ءسۇت بەزى قاتەرلى ىسىگىنە شالدىعادى. ولاردىڭ ىشىندە 1500 ايەل كوز جۇمادى.
2013 - جىلى الماتى بويىنشا 541 ايەلدەن ءسۇت بەزى قاتەرلى ىسىگى انىقتالعان. ولاردىڭ 83 پايىزى اۋرۋدىڭ 1-كەزەڭىندە، 14,5 پايىزى 4-كەزەڭىندە عانا دارىگەرگە قارالعان.
اۆتور: گۇلميرا عوسمانالي
