الماتىدا قازاق تىلىندە ءبىلىم الاتىن وقۋشىلاردىڭ سانى 12 ەسە وسكەن
بۇل تۋرالى قالا باسشىسى احمەتجان ەسىموۆ «انا ءتىلىم - ارداعىم» فەستيۆالى بارىسىندا ايتتى.
«قازىر وزگە ۇلت وكىلدەرى اراسىندا مەملەكەتتىك ءتىلدى ۇيرەنۋ ماقساتىندا بالالارىن قازاق تىلىندەگى بالاباقشالارعا، مەكتەپتەرگە بەرۋشىلەردىڭ قاتارى كوبەيىپ كەلەدى. قالامىزدا 201 مەملەكەتتىك مەكتەپ بار. ولاردىڭ 62 سى قازاق تىلىندەگى مەكتەپ بولسا، 68 ى ارالاس مەكتەپ. 1989 - جىلى الماتىدا 7-اق قازاق مەكتەبى بولسا، قازىر ولاردىڭ سانى 62 گە جەتتى.
تاۋەلسىزدىك العان جىلدارى 8 مىڭ بالا قازاقشا وقيتىن. ولاردىڭ سانى 12 ەسەگە ارتىپ، قازىر الماتى مەكتەپتەرىندە 90 مىڭنان استام بالا قازاق تىلىندە وقيدى»، - دەدى ا. ەسىموۆ.
اكىمنىڭ بايانداۋىنشا، بۇرىن قازاق تىلىندە وقىتۋ ج و و-دا تەك پەداگوگيكالىق ماماندىقتارعا عانا ءتان بولاتىن. قازىر بارلىق ماماندىقتار بويىنشا قازاقشا توپتار اشىلعان.
«1989 - جىلى قازاق تىلىندە وقيتىن ستۋدەنتتەردىڭ ۇلەسى 4 پايىز بولسا، قازىر 51 پايىزعا جەتتى. ءتىل ماسەلەسىن بالاباقشادان باستاۋ دا ءوز ناتيجەسىن بەرە باستادى. الماتىلىق بۇلدىرشىندەردىڭ 70 پايىزى قازاق بالاباقشاسىنا بارىپ ءجۇر. 7 مىڭنان استام وزگە ۇلت وكىلدەرى بالالارىن قازاق بالاباقشالارىنا بەرىپ كەلەدى»، - دەپ قورىتىندىلادى قالا باسشىسى.
اۆتور: گۇلميرا عوسمانالي
