شىعىس قازاقستانداعى 129 اۋىلدا ينتەرنەت جىلدامدىعى وتە باياۋ - ۆيتسە-ءمينيستر
بۇل تۋرالى ءوڭىر جۇرتشىلىعىمەن كەزدەسكەن ق ر سيفرلىق دامۋ، يننوۆاتسيا جانە اەروعارىش ونەركاسىبى ۆيتسە-ءمينيسترى اسحات ورازبەك ءمالىم ەتتى، دەپ حابارلايدى قازاقپارات ءتىلشىسى.
بۇگىنگى تاڭدا وبلىستاعى 363 ەلدى مەكەننىڭ 129 ىندا ينتەرنەت جىلدامدىعى باياۋ. اۋىلداردىڭ جارتىسىنان كوبى 3G بايلانىسىمەن قامتىلعان.
«بۇل اۋىلداردىڭ تۇرعىندارى WhatsApp مەسسەندجەرىن پايدالانا الادى. ءبىراق ۇيالى تەلەفوندا ينتەرنەتتىڭ جىلدامدىعى وتە تومەن. وبلىستاعى ەلدى مەكەندەردىڭ 16 پايىزى عانا 4G بايلانىسىمەن قامتىلعان»، - دەيدى اسحات ورازبەك.
ونىڭ ايتۋىنشا، 234 ەلدى مەكەندە سىمدى ينتەرنەت جوق. وسى ماسەلەنى شەشۋ ءۇشىن ءبىرقاتار شارا قولعا الىنباق.
«ش ق و-نى بايلانىسپەن قامتۋ بويىنشا پيلوتتىق ايماققا اينالدىرعىمىز كەلەدى. بۇل ماقساتتا قالالار مەن اۋىلدارعا بىرنەشە رەت ساپار جاسادىق. «قولجەتىمدى ينتەرنەت» جاڭا ۇلتتىق باعدارلاماسى اياسىندا ءتيىستى جۇمىستار جۇرگىزىلەدى. وبلىس اكىمدىگى دە انتەننا-ماتچتالىق قۇرىلعىلاردى سالۋعا قارجى ءبولىپ وتىر»، - دەيدى ق ر سيفرلىق دامۋ، يننوۆاتسيا جانە اەروعارىش ونەركاسىبى ۆيتسە-ءمينيسترى.
