تاجىكستاننىڭ ەڭ قارت تۇرعىنى 127 جاسىندا كوز جۇمدى
ول 1893-جىلى 13- ناۋرىزدا دۇنيەگە كەلگەن، دەپ حابارلايدى قازاقپارات «حوۆار» اگەنتتىگىنە سىلتەمە جاساپ.
«فوتيما اجەيدىڭ نەمەرە، شوبەرە جانە نەمەنەلەرىنىڭ سانى 200 دەن اسىپ جىعىلادى. بۇل سۇيكىمدى ايەل ءجۇزجىلدىقتىڭ ۇشەۋىن كوردى – 19، 20 جانە 21- ءىنشى»، - دەپ ءمالىم ەتتى اشت اۋدانى مەملەكەت بيلىگىنىڭ اتقارۋشى ورگانىندا.
ب ا ق اقپاراتتارىنا سايكەس، كەيۋانا ءوز بەتىمەن ءجۇرىپ-تۇرىپ، دەنساۋلىعىنا ەشقاشان شاعىمدانباعان.
ەكى جىل بۇرىن داحانا اۋىلىندا ف. ميرزوكۋلوۆا بالالارى، نەمەرەلەرى جانە تۋىس-تۋعاندارى اراسىندا 125 جىلدىق مەرەيتويىن اتاپ ءوتتى. وسىعان وراي سالتاناتتى شارا دا ۇيىمداستىرىلعان.
جىل سايىن انا كۇنى قۇرمەتىنە تاجىكستان رەسپۋبليكاسى پرەزيدەنتىنىڭ اتقارۋشى اپپاراتىنىڭ وكىلدەرى ف. ميرزوكۋلوۆاعا جانە وزگە دە ۇزاق جاساعان ايەلدەرگە ءىلتيپات ءبىلدىرىپ، قوناقتا بولادى.
ونىڭ ءولىمى تۋرالى ءبىرقاتار ب ا ق- تا جازىلدى. ماسەلەن، Daily Mail- ءدىڭ مالىمەتىنشە، تاجىكستاندىق اجەيدىڭ پاسپورتىنداعى دەرەكتەر شىندىققا سايكەس كەلسە، ول الەمدەگى ەڭ قارت ايەل بولىپ تابىلادى.
ايتا كەتەيىك، بۇگىندە رەسمي تۇردە الەمدەگى ەڭ قارت ايەل جاپونيالىق كانە تاناكا سانالادى. ول بيىل 117 جاسقا تولدى.
بىلتىرعى جىلدىڭ قازانىندا رەسەيدىڭ استراحان وبلىسىندا ەڭ ۇزاق ءومىر سۇرگەن ءتانزيلا بيسەمبەيەۆا دۇنيەدەن ءوتتى. ەتنيكالىق قازاق ت. بيسەمبەيەۆا 2016-جىلدان باستاپ رەسمي تۇردە عالامشاردىڭ ەڭ قارت تۇرعىنى اتاندى. بۇل تۋرالى رەسەيدىڭ رەكوردتار كىتابىندا ايتىلعان. ول اعىمداعى جىلى 125 جاسقا تولۋشى ەدى.
