يراكتا كوروناۆيرۋس گوسپيتالىندەگى ءورت قۇرباندارىنىڭ سانى 124 كە جەتتى
كاير. قازاقپارات - يراكتىڭ وڭتۇستىگىندەگى دي- كار پروۆينسياسى ان-ناسيريا قالاسىنداعى كوروناۆيرۋس جۇقتىرعان ناۋقاستارعا ارنالعان اۋرۋحانادا ورتتەن قازا تاپقانداردىڭ سانى 124 كە جەتتى، دەپ حابارلايدى قازاقپارات Al Hadath تەلەارناسىنا سىلتەمە جاساپ.
بۇعان دەيىن قايعىلى وقيعانىڭ 92 قۇربانى تۋرالى حابارلانعان بولاتىن. قازىرگى ۋاقىتتا مارقۇمداردىڭ دەنەلەرىن انىقتاۋ جۇمىستارى ءجۇرىپ جاتىر. پروۆينسيانىڭ ازاماتتىق قورعانىس ءبولىمىنىڭ مالىمەتىنشە، وقيعا قۇرباندارىنىڭ دەنەلەرى ءالى دە تابىلۋى مۇمكىن. يراك پرەمەر- ءمينيسترى مۇستافا ءال-كازيميدىڭ ايتۋىنشا، ورتكە قاتىستى تەرگەۋدىڭ الدىن الا ناتيجەلەرى ءبىر اپتا ىشىندە بەلگىلى بولادى. سونىمەن قاتار، دي كار پروۆينسياسىنىڭ اپەللياتسيالىق سوتى 13 دەنساۋلىق ساقتاۋ سالاسىنىڭ 13 قىزمەتكەرىن قاماۋعا الۋعا سانكسيا بەردى. ءورت دۇيسەنبىگە قاراعان ءتۇنى وتتەگى باللونىنىڭ جارىلىسى سالدارىنان ورىن الدى.
وقيعاعا بايلانىستى ساددام ات-تاۆيل پروۆينسياسىنىڭ دەنساۋلىق ساقتاۋ ءمينيسترى قىزمەتىنەن كەتۋ تۋرالى ءوتىنىش جازدى. ءوز كەزەگىندە يراك پرەمەر-ءمينيسترى ءال-كازيمي قايعىلى جاعدايدىڭ سەبەپتەرى مەن بارلىق جاعدايلارىن تەرگەۋ ءۇشىن ارنايى كوميسسيا قۇرۋدى تاپسىرىپ، ەلدە قۇربان بولعاندارعا ازا تۇتۋ كۇنىن جاريالادى.
