الماتى قالاسىندا 1248 ادامعا شەتەلگە شىعۋعا شەكتەۋ قويىلدى

الماتى. قازاقپارات - الماتى قالاسىندا سالىق تولەمەگەن 1248 ادامعا شەتەلگە شىعۋعا شەكتەۋ قويىلدى.
None
None

بۇل تۋرالى الماتى قالاسى بويىنشا سالىق دەپارتامەنتىنىڭ باسپا ءسوز قىزمەتىنەن حابارلادى.

شەتەلگە شىعۋعا شەكتەۋ قويىلعان ازاماتتاردىڭ جالپى قارىزى 247 ميلليون تەڭگەگە جەتكەن.

تاياۋدا الماتى قالاسىنىڭ سالىق ورگاندارى سوت اكتىلەرىن ورىنداۋ دەپارتامەنتىمەن بىرلەسە وتىرىپ، سالىقتىق بەرەشەگى بار ازاماتتاردىڭ ەلدەن تىسقارى شىعۋلارىنا شەكتەۋ قويۋ بويىنشا ارنايى ءىس-شارالار وتكىزگەن بولاتىن.

سونىڭ ناتيجەسىندە، 1248 بورىشكەرگە قاتىستى قاۋلى شىعارىلدى. بۇل الماتى قالاسىنىڭ سوت ورىنداۋشىلارىنىڭ جىل باسىنان بەرى شىعارعان شەكتەۋلەرىنىڭ 30 پايىزىن قۇرايدى.

جالپى، الماتى قالاسىنىڭ سوت اكتىلەرىن ورىنداۋ دەپارتامەنتى جىل باسىنان بەرى 4848 جەكە تۇلعاعا قاتىستى قاۋلى شىعارعان. بۇل ازاماتتاردىڭ اليمەنتتەن باستاپ، جولدا ءجۇرۋ ەرەجەسىن بۇزۋعا قاتىستى ايىپپۇلدارعا دەيىن سوت اكتىلەرى بويىنشا ءار ءتۇرلى مىندەتتەمەلەرى بولعان. ولاردىڭ ىشىندە جوعارىدا ايتىلعانداي 1248 ادامنىڭ سالىق بويىنشا قارىزدارى بار.

سالىقتىق بەرەشەگى بار سول 1248 ادامنىڭ 334 ى - قوزعالتقىشىنىڭ كولەمى 4000 تەكشە سانتيمەتر بولاتىن قىمبات شەتەلدىك اۆتوكولىكتەردىڭ يەگەرلەرى. ولاردىڭ تولەمەگەن قارىزدارىنىڭ مەرزىمى - 1  جىلدان 4  جىلعا دەيىن.

قازىرگى تاڭدا سالىق بەرەشەكتەرىن ءوندىرىپ الۋ، سونىڭ ىشىندە ءماجبۇرلى تۇردە ءوندىرىپ الۋ جۇمىستارى كۇشەيدى. جىل باسىنان بەرى سوت ورگاندارىنا بەرەشەكتەردى ءماجبۇرلى تۇردە ءوندىرىپ الۋ بويىنشا 2309 ماتەريال كەلىپ تۇسكەن. وسى ماتەريالدار نەگىزىندە سوت ورگاندارى 1850 بورىشكەرگە قاتىستى قارىزدارىن ءماجبۇرلى تۇردە ءوندىرىپ الۋ تۋرالى بۇيرىق شىعاردى.

اۆتور: جاپپاربەرگەن ايبوتا

سوڭعى جاڭالىقتار