10:52, 22 - تامىز 2015 | GMT +5
استانادا 123 مەملەكەتتەن 823 سپورتشى قاتىساتىن دزيۋدودان الەم چەمپيوناتى وتەدى
استانا. قازاقپارات - 24-30 -تامىز ارالىعىندا استانادا ەلىمىزدە العاش رەت الەم بىرىنشىلىگى وتكىزىلەدى.

وعان 123 مەملەكەتتەن 823 سپورتشى (495 ەر مەن 328 قىز) قاتىسادى، دەپ حابارلادى قالالىق اكىمدىكتىڭ باسپا ءسوز قىزمەتىنەن.
سونىمەن بىرگە، ەلورداعا 1000 عا جۋىق قوناق كەلەدى. ولاردىڭ ىشىندە باپكەرلەر مەن فەدەراتسيا باسشىلارى جانە باسقا دا لاۋازىم يەلەرى بار.
بايراقتى باسەكە بارىسىندا جۇمىس ىستەۋ ءۇشىن 160 جۋرناليست تىركەۋدەن وتۋگە ءوتىنىش جاسادى. بۇل چەمپيونات وليمپيادا قارساڭىندا وتكىزىلەتىندىكتەن، بارلىق مەملەكەتتەر ءۇشىن ماڭىزدى.
الەم بىرىنشىلىگى «الاۋ» مۇزايدىنىندا وتكىزىلەدى. جارىس ەرلەر مەن قىزدار اراسىندا 7 سالماق دارەجەسى بويىنشا ۇيىمداستىرىلادى جانە سوڭعى كۇنى كوماندالار ءوزارا سىنعا تۇسەدى.
حالىقارالىق دزيۋدو فەدەراتسياسى باسشىلىعىنىڭ قاتىسۋمەن رەسمي باسپا ءسوز- كونفەرەنسياسى 23 -تامىز كۇنى ساعات 14.30 «ريكسوس» قوناق ۇيىندە وتكىزىلەدى.