ماقتاارالدا زارداپ شەككەندەرگە 120 توننادان استام ازىق-تۇلىك تاراتىلدى
بۇگىندە توتەنشە جاعداي قالىپتاسقان ايماقتاعى تۇرعىندارعا 126 توننادان استام ازىق-تۇلىك تاراتىلعان، دەپ حابارلايدى قازاقپارات ءتىلشىسى.
وبلىس اكىمدىگىنىڭ مالىمەتىنشە، اتالعان قويماعا كۇندەلىكتى قازاقستاننىڭ ءار وڭىرىنەن گۋمانيتارلىق كومەكتەر كەلۋدە. قازىرگى تاڭدا قويمادا 200 تونناعا جۋىق ۇن، 22 توننا ەت، 70 تونناداي كوكونىس، سونداي-اق، كورپە-توسەك پەن كيىم-كەشەكتەر بار.
بۇدان بولەك، جاڭادان قۇرىلىسى جۇرەتىن تۇرعىن ۇيلەرگە قاجەتتى قۇرىلىس ماتەريالدارى دا جيناقتالعان.
اتاپ ايتقاندا، قويماعا 20 مىڭ دانا كىرپىش، 100 توننا تسەمەنت، 700 دانادان استام اعاش، 108 قوراپ گيپسوكارتون جانە قۇرىلىس ۇنتاقتارى جەتكىزىلگەن.
اتالعان ماتەريالدار مىرزاكەنتتەگى بوي كوتەرىپ جاتقان جاڭا مولتەكاۋداننىڭ قۇرىلىسىنا جۇمسالماق.
ايتا كەتەيىك، ء«بىز بىرگەمىز» اكتسياسى اياسىندا ماقتاارالعا نۇر-سۇلتان مەن الماتى قالاسى، الماتى جانە جامبىل وبلىسى، اتىراۋ، اقتوبە، ماڭعىستاۋ، باتىس جانە شىعىس قازاقستان وبلىستارىنان جانە قازاقستان حالىق اسسامبلەياسى تاراپىنان كومەكتەر كەلگەن. سونداي-اق، ەلىمىزدەگى جەكەلەگەن كاسىپكەرلەر مەن ازاماتتار دا اتاسالىسۋدا.
