ديماشتىڭ ونەرىن جارتى كۇندە 120 ميلليون ادام كورگەن

نۇر-سۇلتان. قازاقپارات - قازاقستاندىق ءانشى ديماش قۇدايبەرگەننىڭ ونەرى جارتى كۇننىڭ ىشىندە 120 ميلليون قارالىم جينادى، دەپ حابارلايدى قازاقپارات.

بۇل تۋرالى ءانشى ءوزىنىڭ الەۋمەتتىك جەلىدەگى پاراقشاسىندا جازدى.

«Weibo دەپ اتالاتىن (قىتايلىق ينستاگرامدا) The masked singer باعدارلاماسىندا كورسەتكەن ونەرىم 12 ساعات ىشىندە 120 ميلليون كورىلىم جينادى. بارشاڭىزعا قولداۋلارىڭىزعا راحمەت»، - دەيدى ءانشى.

ەسكە سالساق، بۇعان دەيىن ديماش قۇدايبەرگەن قىتايدا وتكەن بەتپەردە كيگەن ءانشى (Mask Singer) شوۋىنا قاتىسىپ، ونەر كورسەتكەنى تۋرالى حابارلاعان بولاتىنبىز.

ايتا كەتسەك، Mask Singer - قىتايدىڭ ۆوكالدىق رەاليتي شوۋى. وعان قاتىسقان تانىمال تۇلعالار ءوزىن تانىتپاس ءۇشىن بەتپەردە كيىپ الادى. شوۋدى لي حاو جۇرگىزەدى. انشىلەردىڭ ونەرىن قازىلار القاسى باعالاپ وتىرادى. شوۋدىڭ تۇساۋكەسەرى 2016 -جىلعى 18 -قىركۇيەكتە Jiangsu Television دا بولعان.