انكارادا س. سەيفۋلليننىڭ 120 جىلدىعىنا وراي وتكەن شارادا تۇركى جۇرتىنىڭ زيالىلارى باس قوستى - فوتو
حالىقارالىق جيىندا شەتەلدىك قوناقتار، ساكەن تانۋشى- عالىمدار مەن ساكەن شىعارماشىلىعىمەن ەتەنە تانىس تۇرىك جۇرتشىلىعى باس قوستى.
ايتۋلى شاراعا تۇركىسوي باس حاتشىسى دۇيسەن قاسەيىنوۆ، قىرعىز رەسپۋبليكاسىنىڭ توتەنشە جانە وكىلەتتى ەلشىسى يبراگيم جۋنۋسوۆ، قازاقستان رەسپۋبليكاسىنىڭ تۇركياداعى توتەنشە جانە وكىلەتتى ەلشىلىكتىڭ مادەنيەت اتاشەسى ازامات وتەپبايەۆ، قاراعاندى وبلىسى جاڭاارقا اۋدانىنىڭ اكىمى عابدراحمان وماروۆ، بەلگىلى تۇركولوگ- عالىم حاكىم ومار، جۋرناليست باقتىباي ءجۇمادىلدين، عالىم ارحيمەد جانعازيەۆ، ۇلتتىق ونەر مەن مادەنيەتتىڭ قولداۋشىسى، بەلگىلى مەسەنات ساكەن سەيفۋللين، ق. قۋانىشبايەۆ اتىنداعى اكادەميالىق دراما تەاترىنىڭ اكتەرى قانات ءجۇنىس، ۇلتتىق پرەزيدەنت وركەسترىنىڭ تالانتتى ءانشىسى بيبيگۇل ساۋىتوۆا، ساكەن سەيفۋلليننىڭ تۋىسى اسىلگۇل ءابىش، ەۋرازيا جازۋشىلار وداعىنىڭ ءتوراعاسى ياكۋب وماروعلى قاتىستى.
سونداي- اق ساكەنتانۋشى- عالىمدار فيلولوگيا عىلىمدارىنىڭ دوكتورلارى گازي ۋنيۆەرسيتەتىنىڭ دوتسەنتى ءجاميليا كىناجى، انكارا ۋنيۆەرسيتەتىنىڭ دوتسەنتى مۇرات جەريتوعلى، نيعدە ۋنيۆەرسيتەتىنىڭ دوتسەنتى حيكمەت قوراش، انكارا قالاسى ەتيمەسگۋد اۋدانىنىڭ اكىم ورىنباسارى الاددين سونات، ادەبي شىعارمالاردىڭ اۆتورلىق قۇقىن قورعاۋ ۇيىمى يلەسام- نىڭ ءتوراعاسى مەحمەت نۇري پارماكسىز جانە تۇركى جۇرتىنىڭ باسقا زيالى قاۋىم وكىلدەرى دە شارادان تىس قالمادى.
جيىندا العاشقى ءسوز العان تۇركىسوي باس حاتشىسى دۇيسەن قاسەيىنوۆ: «ساكەن سەيفۋللين قازاقتىڭ عانا ەمەس، بۇكىل تۇركى جۇرتىنا ورتاق تالانتتى تۇلعا. 1924 - جىلى تۇركياداعى جاعدايدى سارالاپ، بايانداما جازعان اتاقتى اقىن ەكى ەل اراسىنداعى دوستىق پەن باۋىرمالدىقتى اتاپ وتكەنى بارشاعا ءمالىم. قازاقستاننىڭ تۇكپىر- تۇكپىرىندە ساكەننىڭ سەيفۋللينگە ارنالعان جيىندار مەن كونسەرتتىك باعدارلامالار ءوتتى. بۇگىنگى كۇندە تۇركيانىڭ تورىندە سوناۋ جاڭاارقا اۋدانىنان باستاۋ العان توي جالعاسىن تاۋىپ ءوتىپ جاتىر. تويلارىڭىز قۇتتى بولسىن، اعايىن!» - دەپ تۇرىك جۇرتىنا العىس ايتىپ قۇتتىقتادى.
قىرعىز رەسپۋبليكاسىنىڭ تۇركياداعى ەلشىسى يبراگيم جۋنۋسوۆ ساكەن سەيفۋلليننىڭ شىعارمالارى مەن ودان قالعان ولمەس مۇرالارى قازاقتىڭ عانا ەمەس، قىرعىز ەلى ءۇشىن دە اسا قىمباتتى ەكەندىگىن، سونداي- اق ءبىر توپ قىرعىز اقىندارى ساكەننىڭ ولەڭدەرىن قىرعىز تىلىندە سويلەتىپ، پوەزياداعى بيىكتىگىن، ەرەكشە تالعامى مەن ۇلى اقىنعا ءتان قاسيەتىن كورسەتىپ كەلگەندىگىن ايتتى.
قاراعاندى وبلىسى جاڭاارقا اكىمى عابدراحمان وماروۆ قۇشاق جايا قارسى العان تۇرىك جۇرتىنا العىس ءبىلدىرىپ: «بۇگىنگى ءوتىپ جاتقان حالىقارالىق جيىندى ۇيىمداستىرىپ وتىرعان جانە جاڭاارقا اۋدانىندا قىركۇيەك ايىندا «مادەني- مۇرا» ستراتەگيالىق ۇلتتىق جوباسى اياسىندا وتكەن «تۋعان جەردەن تۇلەپ ۇشىپ، ۇلت ماقتانىشىنا اينالعان تۇلعالار جانە ولاردىڭ مۇرالارىنىڭ تاعىلىمى» اتتى كونفەرەنسياسىنىڭ وتۋىنە بۇكىل تۇركى تىلدەس حالىقتاردىڭ مارتەبەلى ۇيىمى تۇركىسوي- دىڭ تىكەلەي قولداۋىن ەرەكشە اتاپ وتكىم كەلەدى. ساكەن سەيفۋللين شىعارمالارىنا دەن قويىپ، تۇرىك تىلىندە سويلەتىپ، ونىڭ تەرەڭ ويلارىن زەرتتەپ، پوەزياسىنا ءمان بەرىپ جۇرگەن تۇرىك باۋىرلارىمىزعا العىسىمىز شەكسىز»، - دەدى.
جيىن بارىسىندا ونەر كورسەتكەن بىرنەشە بايقاۋلاردىڭ جەڭىمپازدارى، تالانتتى انشىلەر قانات ءجۇنىسوۆ پەن بيبيگۇل ساۋىتوۆا ساكەن سەيفۋلليننىڭ سوزىنە جازىلعان اندەردى شىرقاپ، تۇرىك جۇرتشىلىعىن ءتانتى ەتتى. ساكەننىڭ نەمەرەسى ساكەن سەيفۋللين وتباسى اتىنان تۇركسوي ۇيىمى مەن تۇرىك جۇرتشىلىعىنا العىس لەبىزىن ءبىلدىردى. جيىندى جۇرگىزگەن قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ تۇركسوي- داعى وكىلى مالىك وتاربايەۆ.
قازاقستاندىق دەلەگاتسيا تۇركسوي تاراپىنان ۇيىمداستىرىلعان شارا بارىسىندا انكارانىڭ تورىنە قويىلعان قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ ەسكەرتكىشىندە بولدى. سودان كەيىن اباي، ماعجان جانە شىڭعىس ايتماتوۆتاردىڭ ەسكەرتكىشتەرىنە بارىپ گۇل شوقتارىن قويدى. ارتىنان اتاتۇرىك مۇراجايىن تاماشالادى.
