پاۆلودار وبلىسىندا اسكەرگە شاقىرىلعان 1200 گە جۋىق ازامات ىزدەۋدە ءجۇر

None
پاۆلودار. قازاقپارات - پاۆلودار وبلىسىندا اسكەرگە شاقىرىلعان 1200 گە جۋىق ازامات ىزدەۋدە ءجۇر، دەپ حابارلايدى قازاقپارات Pavlodarnews.kz سىلتەمە جاساپ.

پاۆلودار وبلىسىنىڭ قورعانىس ىستەرى جونىندەگى دەپارتامەنت باسشىسىنىڭ ورىنباسارى الماسبەك بۇحاربايەۆ مالىمەتىنشە، كۇزگى اسكەري قىزمەتكە شاقىرۋ ناۋقانى كەزىندە جەرگىلىكتى پوليتسيا قىزمەتىمەن بىرلەسە وتىرىپ، ىزدەستىرۋ جۇمىستارى ۇيىمداستىرىلدى. ناتيجەسىندە 250 ازامات تابىلىپ، بۇگىندە 1163 ازامات ءالى دە ىزدەۋدە ءجۇر.

«2022 -جىلى مەرزىمدى اسكەري قىزمەتكە 18-27 جاس ارالىعىنداعى 4798 ازامات شاقىرىلعان. الايدا، سونىڭ ىشىندە دەنساۋلىق جاعدايىنا بايلانىستى 507 ازامات، وتباسى جاعدايىنا بايلانىستى 202 ازامات، ءبىلىم الۋىنا بايلانىستى 1455 ازامات اسكەري قىزمەتكە بارمادى»، - دەدى الماسبەك بۇحاربايەۆ.

2022 -جىلى 200-دەن استام ادامعا مەرزىمدى اسكەري قىزمەتتەن جالتارعانى ءۇشىن اكىمشىلىك قۇقىق بۇزۋشىلىق بويىنشا حاتتاما تولتىرىلعان.

سونداي-اق دەپارتامەنت باسشىسىنىڭ ورىنباسارى ازاماتتاردىڭ اسكەرگە بارۋدان باس تارتۋ سەبەبىن ءتۇسىندىردى.

«كوپ ازاماتتار ءبىر جىل ۋاقىتىن جوعالتۋعا قورقادى. اسكەرگە بارار الدىندا ولاردا «نەگە مەن ودان دا ول ۋاقىتتا بىلىمگە نەمەسە جۇمىس ىستەۋگە جۇمسامايمىن؟» دەگەن سياقتى سۇراق تۋىندايدى. ياعني بۇل قورقىنىش ەمەس»، - دەپ اتاپ ءوتتى الماسبەك بۇحاربايەۆ.

سپيكەردىڭ سوزىنشە، بۇگىندە اسكەرگە بارىپ، ازاماتتىق بورىشىن وتكەپ كەلگەن ازاماتتارعا جەڭىلدىكتەر قاراستىرىلعان. قورعانىس ءمينيسترى رەسپۋبليكا بويىنشا 50 دەن استام ءبىلىم بەرۋ مەكەمەسىمەن مەموراندۋمعا قول قويدى. اسكەري بورىشىن وتەپ كەلگەن اسكەري قىزمەتشىلەر ۇ ب ت تاپسىرماي گرانتقا وقۋعا ءتۇسىپ، جوعارعى ءبىلىم الا الادى. سونىمەن قاتار نەسيە تولەۋ مەرزىمى 13 ايعا توقتاتىلادى جانە كوممۋنالدىق تولەمنىڭ 50 پايىزى تولەنەدى.

سونىمەن قاتار قازاقستاندا اسكەرگە بارا الماعاندارعا اقىلى تۇردە اسكەري بورىشىن وتەۋگە مۇمكىندىك بەرىلەدى. پاۆلودار وبلىسىندا مۇنداي اسكەري جيىننىڭ قۇنى 304 مىڭ تەڭگەنى قۇرايدى.

«2022 -جىلى قورعانىس مينيسترلىگى پاۆلودارداعى فيليالىنىڭ اسكەري-تەحنيكالىق مەكتەبىنە، ياعني 40 كۇندىك اسكەرگە 24 جاسقا تولعان 170 ازامات جىبەرىلدى»، - دەدى الماسبەك بۇحاربايەۆ.

ايتا كەتەيىك، 2023 -جىلى وڭىردە كوكتەمدە 865 ازامات مەرزىمدى اسكەري قىزمەتكە شاقىرۋ جوسپارلانعان.

سوڭعى جاڭالىقتار