جامبىل وبلىسىندا 1200 ساۋىن سيىرعا ارنالعان ءسۇت فەرماسى سالىنىپ جاتىر

 فەرمانىڭ جوبالىق قۇنى 1 ميلليارد تەڭگە. بۇل قارجىعا قۇرىلىس جۇمىستارى مەن فەرماعا قاجەتتى گوللانديالىق قۇرال جابدىقتار ساتىپ الىنادى. قازىر قۇرىلىستىڭ 75 پروتسەنتى اياقتالعان. سەرىكتەستىكتەگى ساۋىن سيىرعا ارنالعان كەشەندە 15 ادام قۇرىلىس جۇمىستارىن جۇرگىزىپ جاتىر. سودان كەيىن گوللانديالىق تەحنولوگيانى ورناتۋ جوسپارلانعان. ەگەر جوبا ىسكە اسسا، كەلەسى جىلى شەتەلدەن 1200 باس اسىل تۇقىمدى ءسۇتتى سيىرلار اكەلىنەدى.

 «قۇرىلىستىڭ جالپى اۋماعى 3 گەكتاردى قۇرايدى. مۇنداعى سوعىلىپ جاتقان ەكى كەشەندە 600 باس ساۋىن سيىرلار بولادى. ال ءۇشىنشىسى اۆتوماتتاندىرىلعان ءسۇت ساۋۋ زالى مەن مال تولدەتۋگە ارنالعان ورىن بار. قازىر سەرىكتەستىكتەگى مال باسىنىڭ سانى ەكى مىڭعا جۋىقتاعان. ونىڭ 800-دەن استامى اسىل تۇقىمدى سيىرلار. مۇندا كۇنىنە 7 توننا ءسۇت الىنادى. 150 ادامدى تۇراقتى جۇمىسپەن قامتىپ وتىرعان سەرىكتەستىك جاڭا فەرما ىسكە قوسىلسا، جۇمىسشىلار قاتارىن تاعى 50 اداممەن تولىقتىرامىز دەپ وتىر»، - دەيدى قۇرىلىس ۋچاسكەسىنىڭ باستىعى ماكسيم سلادكوۆ.

ال جۋالى اۋدانى اكىمدىگىنىڭ اۋىلشارۋاشىلىق ءبولىمىنىڭ سەكتور مەڭگەرۋشىسى ءسابيت نۇرلىبايەۆ 1200 باسقا ارنالعان ءسۇت تاۋارلى فەرمانى 2020 -جىلى تولىقتاي اياقتاۋ جوسپارلانىپ وتىرعاندىعىن ايتادى.

 «ونىڭ ىشىندەگى قوندىرعىلاردىڭ بارلىعى گوللانديالىق تەحنولوگيامەن ەنگىزىلەدى، ەندى ول قوندىرعىنىڭ بارلىعى تولىقتاي بىتكەن جاعدايدا بۇل تاۋارلى ءسۇت فەرمادا 50 ادامداي جۇمىسپەن تولىقتاي قامتاماسىز ەتىلەدى. سەرىكتەستىكتىڭ بىلتىرعى وندىرگەن ءونىم كولەمى 844 ميلليون تەڭگەنى قۇراعان. نەگىزگى باسىمدىق ءسۇت پەن ەت باعىتى بولعاندىقتان مالعا قاجەتتى جەم- ءشوپتى دە وزدەرى دايىندايدى. بۇگىنگى كۇنى 1000 گەكتار القاپقا ارپا بيداي، 400 گەكتار جەرگە كوپ جىلدىق ءشوپ ەگىلگەن»، - دەيدى سەكتور مەڭگەرۋشىسى.