استانادا جالعا زاڭسىز بەرىلەتىن 1200 پاتەر انىقتالدى
بۇل تۋرالى استانا قالاسى ءى ءى د جەرگىلىكتى پوليتسيا قىزمەتىنەن ءمالىم ەتتى، دەپ حابارلايدى قازاقپارات.
ايتا كەتەيىك، 2017 -جىلدىڭ 10 -قىركۇيەگىنەن باستاپ 1 -جەلتوقسانعا دەيىن استانادا «ۋچاسكە» جەدەل الدىن الۋ ءىس-شاراسى وتۋدە. شاراعا استانا قالاسى ىشكى ىستەر دەپارتامەنتىنىڭ بارلىق بولىمشەلەرىنىڭ جەكە قۇرامى مەن ق ر ءى ءى م ۇلتتىق ۇلانىنىڭ اسكەري قىزمەتكەرلەرى قاتىسۋدا. ءىس-شارانىڭ ماقساتى - ۋچاسكەلىك ينسپەكتورلاردىڭ، كوشى- قون، كريمينالدىق جانە پاترۋلدىك پوليتسيا، سونىڭ ىشىندە جەدەل ارەكەت ەتۋشى بولىمشەلەردىڭ جانە باسقا قىزمەتتەردىڭ كۇشتەرىمەن ءاربىر اكىمشىلىك ۋچاسكەدە قۇقىق بۇزۋشىلىقتاردىڭ الدىن الۋ بويىنشا جۇمىستىڭ قارقىنىن ارتتىرۋ.
«ۋچاسكە» جەدەل الدىن الۋ ءىس-شاراسى باستالعالى ۋچاسكەلىك ينسپەكتورلار 115 مىڭنان استام پاتەردى جانە 9000 نان استام جەكە ءۇيدى ارالاپ شىقتى. ءى ءى و تىركەۋىندە تۇرعان شامامەن 4500 ازامات تۇرعىلىقتى جەرى بويىنشا تەكسەرىلدى. سونداي-اق، 7000 نان استام ازاماتتىق قارۋ يەگەرى تەكسەرىلىپ، ونىڭ ىشىندە 57 قارۋدى ساقتاۋ ەرەجەلەرىن بۇزۋ انىقتالدى. ۋچاسكەلىك ينسپەكتور شامامەن 312 دەن اسا اكىمشىلىك ۋچاسكەدە حالىق الدىندا ەسەپ بەردى»، - دەلىنگەن تاراتىلعان اقپاراتتا.
ۆەدومستۆو مالىمەتىنشە، ءىس-شارا جۇرگىزىلۋ بارىسىندا زاڭسىز جالعا بەرىلەتىن شامامەن 1200 پاتەر تىركەلىپ، اقپارات مەملەكەتتىك كىرىس دەپارتامەنتىنە جىبەرىلدى. تۇرعىلىقتى جەرى جوق 36 ازامات قابىلداپ-تاراتۋ ورنىنا جەتكىزىلدى. جالپى «ۋچاسكە» جەدەل الدىن الۋ ءىس- شاراسى باستالعالى اكىمشىلىك جاۋاپكەرشىلىككە 9400-دەن استام ادام تارتىلعان.
