1200 ەلدى مەكەندى سۋ باسۋ قاۋپى بار. تاسقىننىڭ الدىن الۋ ءۇشىن نە ىستەلىپ جاتىر

استانا. KAZINFORM - بۇگىنگى تاڭدا ەلىمىزدە سۋ باسۋ قاۋپى بار ايماقتاردا 1223 ەلدى مەكەن بار. ت ج ءمينيسترى شىڭعىس ءارىنوۆ اپاتتىڭ الدىن الۋ ءۇشىن قانداي جۇمىستار قولعا الىنعانىن ايتىپ بەردى.

ونىڭ ايتۋىنشا، توتەنشە جاعدايلاردىڭ الدىن الۋ جونىندەگى نەگىزگى ءىس-شارالار ورتالىق جانە جەرگىلىكتى اتقارۋشى ورگاندارعا جۇكتەلگەن.

- سۋ تاسقىنى اياقتالعان سوڭ وڭىرلەر الدىن الۋ شارالارى مەن ينجەنەرلىك جۇمىستاردى باستادى. جالپى وڭىرلەردە 1400 سۋ تاسقىنىنا قارسى ءىس- شارالار ىسكە اسىرىلدى. مىسالى ەلدى مەكەندەردى قورعاۋ ءۇشىن 576 كيلومەتر قورعانىش بوگەتتەرى مەن بىلىكتەرى سالىندى. 164 كيلومەتر درەناج جۇيەسى جوندەلدى جانە سالىندى، 960 اۆتوموبيل جانە تەمىر جولداردىڭ استىنا سۋ وتكىزۋ قۇرىلىستارى ورناتىلدى جانە اۋىستىرىلدى، 658 كيلومەتر كانالدار مەن ارىقتار قۇرىلدى، - دەدى ش. ءارىنوۆ سەناتتا وتكەن ۇكىمەت ساعاتىندا.

74 وزەننىڭ قاۋىپتى ۋچاسكەسىندە 300 شاقىرىمنان استام تەرەڭدەتۋ مەن جاعالاۋدى نىعايتۋ، 190 شاقىرىم تازارتۋ جۇمىستارى جۇرگىزىلدى.

ەلدى مەكەندەردىڭ ىشىندە جاڭبىر مەن درەناج جۇيەلەرى جوندەلىپ، سالىنۋدا. سونداي-اق ەلدى مەكەندەردەن قار شىعارۋ ءۇشىن قاۋىپسىز پوليگوندار الدىن الا انىقتالعان.

پرەزيدەنت تاپسىرماسىمەن مينيسترلىك قاراماعىندا توتەنشە جاعدايلاردىڭ الدىن الۋ كوميتەتى قۇرىلدى. بۇل بولىمشە تابيعي جانە تەحنوگەندىك سيپاتتاعى توتەنشە جاعدايلاردىڭ الدىن الۋ شارالارىنىڭ ورىندالۋىن باقىلايدى.

- مينيسترلىك ىقتيمال سۋ تاسقىنىن جويۋ ءتاسىلىن قايتا قارادى. ءبىرىنشى كەزەكتە، ءبىز قاۋىپتى ۋچاسكەلەرگە مونيتورينگ جۇرگىزىپ، تونگەن قاتەرگە دەرەۋ دەن قويامىز. بۇل تاجىريبە ءورت قاۋىپتى كەزەڭدە قولدانىلعان بولاتىن جانە تيىمدىلىگىن كورسەتتى. وسىلايشا ستراتەگيالىق جوسپارلاۋ جانە شۇعىل باسقارۋ كوماندالىق ورتالىعى قۇرىلدى. ونىڭ نەگىزىندە تەحنوگەندىك جانە تابيعي اپاتتاردى بولجاۋ، مودەلدەۋ جانە تالداۋ ءۇشىن ءبىرقاتار سيفرلىق سەرۆيس بىرىكتىرىلدى. ولاردىڭ ءبىرى سۋ تاسقىنىن بولجاۋ جانە مودەلدەۋ جۇيەسى - «TASQYN». بۇل جۇيە سۋ شىعىندارىنىڭ جانە وزەندەردىڭ دەڭگەيى ۇزاق جانە قىسقا مەرزىمدى كەزەڭگە بولجام بەرە الادى، - دەدى سپيكەر.

سۋ تاسقىنىن مودەلدەۋ ناتيجەلەرىنىڭ دالدىگى مەن دۇرىستىعى قازگيدرومەت بولجامىنا جانە سۋ قويمالارىنان سۋدى اعىزۋ بويىنشا قازسۋشار ۇسىنعان دەرەكتەرگە، سونداي-اق جەرگىلىكتى جەر بەدەرىنىڭ سيفرلىق مودەلىنىڭ وزەكتى دەرەكتەرى مەن باتيمەترياعا بايلانىستى بولادى. ماماندار مەن مۇددەلى مەملەكەتتىك ورگاندار كۇن سايىن قار دەڭگەيى، وزەندەردىڭ جاي-كۇيى جانە اۋا رايى جاعدايلارى تۋرالى دەرەكتەردى تالدايدى.

بۇعان دەيىن سەنات ءتوراعاسىنىڭ ورىنباسارى جاقىپ اسانوۆ جىل سايىن تاسقىننىڭ سەبەبىمەن ەمەس، تەك سالدارىمەن كۇرەسە بەرسەك، ەشقانداي بيۋدجەتتىڭ اقشاسى جەتپەيتىنىن ايتقان ەدى.

ايتا كەتەيىك، ەلىمىزدىڭ 4 مينيسترلىگى بىرلەسىپ، سۋ تاسقىنىن بولجاۋعا جانە مودەلدەۋگە مۇمكىندىك بەرەتىن Tasqyn اقپاراتتىق جۇيەسىن ازىرلەۋدە. Tasqyn جۇيەسى بويىنشا العاشقى سۋ تاسقىنى بولجامى اقپان ايىندا جاريالانادى.

اۆتور

ايجان سەرىكجان قىزى