120 مىڭ دوللارعا باعالانعان بانان

  وسىدان بەس جىل بۇرىن حالىقارالىق «اrt Basel MiamI» اتتى سۋرەتشىلەر جارمەڭكەسىندە 120 مىڭ دوللارعا باعالانعان ماۋريتسيو كەتتالاننىڭ جاڭا «ونەر تۋىندىسى» كورەرمەنگە جول تارتتى.

ايگىلى ەدۆارد مۋنكتىڭ «ايقايىنان» دا قىمباتقا تۇسكەن بۇل شىعارما - سكوتچپەن قابىرعاعا جاپسىرىلعان كادىمگى بانان بولدى. ءبىزدىڭ قوعامدا دا ءوزىنىڭ قۇنىنان الدەقايدا جوعارى باعالانىپ جاتقان قانشاما «ونەر تۋىندىلارى» بار دەسەڭىزشى. اسىرەسە ءان ماتىنىندەگى اتتەگەن- ايلار.. .

ماسەلەن، قازاق ەستراداسىندا بەلەڭ الىپ جاتقان ۇلگىسى ناشار ۇردىستەردىڭ ءبىرى - جاپپاي ءسوز ويناتۋ. بۇل ناۋقاسقا اۋەلى ايتىسكەرلەر قاتتى شالدىعىپ ەدى. ولەڭنىڭ سوڭعى ەكى تارماعىن ىشكى ۇيقاسقا ءتۇسىرىپ الىپ، شۋماقتى شۇبىرتا بەرەدى. كەيىن وسى اقىندار انگە ءسوز جازۋعا كىرىسىپ، ول جاقتىڭ دا تۇنىعىن لايلادى. وي تايازدىعىن بالتالاسا مۇرتى بۇزىلمايتىن ۇيقاسپەن جاسىرۋ ءادىسىن ايتىستان انگە اكەلىپ قۇرتتى.

وسى تەكتەس اندەردە ليريكادان گورى كەيىپكەرلەردىڭ ىشكى پولەميكاسى ءجيى بوي كوتەرەدى. قىز بەن جىگىتتىڭ نازىك ماحابباتىنان گورى، قارا ءدۇرسىن ءسوز قاعىسى باسىم. قىزدى الىپ قاشىپ، كەلىن قىلۋ، اۋىلدىڭ قالادان جاقسىراق ەكەنىن دالەلدەۋ، قالىڭ مال سياقتى تاقىرىپتارعا قۇرىلعان اندەر ماحابباتتىڭ مۇباراك ءمۇسىنىن ايعىزدايتىنداي كورىنەدى. جاقىندا ءسوزىن ايتىسكەر قاينار الاگوزوۆ، اۋەنىن تانىمال ءانشى ادىلەت جاۋعاشار جازعان «ماھىر» دەگەن ءان جارىققا شىقتى. وندا دا جوعارىداعى بەلگىلەردى بايقاۋعا بولادى.

جانىم ماھىر، ماھىر دەپ،

اھ ۇراسىڭ اقىم دەپ.

كونەيىن ساعان.

ەركەلەتىپ كۇنبە كۇن،

قىردىڭ قىزىل گۇلدەرىن

تەرەيىن ساعان.

ەندى قالاي سىر اشام،

ەرتەگىڭدى قۇراساڭ،

دجەت سامولەت سۇراساڭ،

نە دەيىن ساعان؟

كەزىندە ماڭعىستاۋدا ءسوز- شالىق بولعان اقىنسىماق قاشاعان جىراۋدىڭ باتاسىن الامىن دەپ قيىلىپ قويماي، بيلەردىڭ الدىندا اڭگىلەنىپ «ءانىن» ايتىپتى. ونىمەن قويماي «باتاڭدى بەرسەڭ جىلدام بەر» دەپ بەيادەپتىك تانىتادى. سوندا ادايدىڭ ءماتجان تىلەۋماعامبەت ۇلى دەگەن ۇلىق ءبيى اقىلسىز ولەڭىڭنىڭ اقىسى دەپ «اقىندى» قامشىنىڭ استىنا الادى. مىنە، ولەڭنىڭ الدىنداعى جاۋاپكەرشىلىك! قازىر زامان باسقا. ۇرەگەيلەردىڭ ءۇنىن ءوشىرىپ، دۇرەگەيلەرگە دۇرە سوعىپ جۇرگەن ەشكىم جوق. ايتسە دە ونەر تۋىندىلارىن ساحناعا شىعارماس بۇرىن سىننىڭ سيراتىنان وتكىزىپ الۋ قاجەت- اق.

ايتپاقشى، جوعارىدا ايتقان ماۋريتسيو كەتتالاننىڭ بانانى ەل نازارىنا ۇسىنىلعاننان كەيىن، مىناداي قىزىق ءارى كۇلكىلى جاعداي بولادى. نو حەن سۋ اتتى كورەي ۋنيۆەرسيتەتىنىڭ ستۋدەنتى كورۋشىلەر تارقاعاننان كەيىن «ونەر تۋىندىسىن» جەپ قويادى. كەيىن تەنتەك بالا باناننىڭ قابىعىن قايتادان ورنىنا جاپسىرىپ كەتەدى. ستۋدەنت بۇل ارەكەتىن تۇسكى استى ىشپەي شىعىپ، قارنى ابدەن اشىپ قالعانىمەن تۇسىندىرگەن. وسىلايشا، 120 مىڭ دوللارعا باعالانعان «ونەر تۋىندىسى» جاننىڭ ەمەس، ءتاننىڭ ازىعى بولىپ كەتە بارعان.

ابزال ماقاش

egemen.kz