12 جاستاعى قازاقستاندىق درون-پيلوت ا ق ش- تاعى الەم چەمپيوناتىندا بەسىنشى ورىن الدى
استانا. KAZINFORM - ورال قالاسىنىڭ 12 جاستاعى تۇرعىنى ءاليحان نىسانبايەۆ ا ق ش- تا وتكەن MultiGP World Championship 2026 الەم چەمپيوناتىندا 44 ەلدەن كەلگەن سپورتشىلارمەن باق سىناپ، فينالدا بەسىنشى ورىن يەلەندى.
ول درون-فۋتبولدان وتكەن حالىقارالىق تۋرنيردە دە قازاقستان قۇراماسى ساپىندا ۇزدىك بەستىكتىڭ قاتارىنا ەنگەن.
درون جارىسى - سپورتشى ارنايى كوزىلدىرىك ارقىلى ۇشقىشسىز ۇشۋ اپپاراتىن باسقارىپ، ونى كۇردەلى كەدەرگىلەردەن وتكىزەتىن جىلدامدىق سايىسى. مۇندا دروندى ءدال ءارى شاپشاڭ باسقارۋ، باعىتتى دۇرىس تاڭداۋ جانە ءبىر ساتتە شەشىم قابىلداۋ ماڭىزدى.
ءاليحان الەم چەمپيوناتىنا 5-6 اي دايىندالعان. ال ونىڭ جاتتىقتىرۋشىسىنىڭ ايتۋىنشا، حالىقارالىق جارىسقا ىرىكتەۋ مەن جۇيەلى دايىندىق ەكى جىل بۇرىن باستالعان. بيىل ناۋرىزدا وتكەن رەسپۋبليكالىق جارىستا جەڭىسكە جەتكەن وقۋشى ا ق ش- تا وتەتىن چەمپيوناتقا جولداما العان.
- ناۋرىزدا وتكەن رەسپۋبليكالىق جارىستا ءبىرىنشى ورىن الىپ، ا ق ش- قا بارۋعا مۇمكىندىك الدىم. الەم چەمپيوناتىندا 12 فيناليستىڭ قاتارىنا ەنىپ، بەسىنشى ورىنعا تۇراقتادىم. سەزىمىمدى سوزبەن جەتكىزۋ قيىن. قارسىلاستارىم وتە مىقتى بولدى. اسىرەسە وڭتۇستىك كورەيا مەن جاپونيادان كەلگەن سپورتشىلاردىڭ شەبەرلىگى ەرەكشە اسەر قالدىردى. ولاردىڭ جاسى 21-22 دە، مەنەن الدەقايدا ۇلكەن. سوعان قاراماستان، جارىس بارىسىندا تانىسىپ، دوستاسىپ كەتتىك، - دەدى ءاليحان نىسانبايەۆ Jibek Joly تەلەارناسىنىڭ «بۇگىن. LIVE» باعدارلاماسىندا.
جاتتىقتىرۋشىسىنىڭ سوزىنشە، ءاليحان حالىقارالىق جارىستارعا العاش رەت قاتىسىپ وتىرعان جوق. بىلتىر دا الەم چەمپيوناتىندا باق سىناپ، ەكىنشى ورىن العان. بيىل ەكىنشى رەت الەمنىڭ ۇزدىك درون-پيلوتتارىمەن جارىسىپ، فينالعا دەيىن جەتتى.
دروندى باسقارۋدىڭ ءوز ەرەكشەلىگى بار. ءاليحان جارىس دروندارىن ارنايى كوزىلدىرىك ارقىلى باسقارادى. ال درون-فۋتبولدا سپورتشىلار ارنايى پۋلتتى پايدالانادى. جاتتىقتىرۋشىنىڭ تۇسىندىرۋىنشە، بۇل ەكى باعىتتا قولدانىلاتىن درونداردىڭ كولەمى مەن باسقارۋ ءتاسىلى دە ءارتۇرلى.
- ماعان جىلدام دروندارمەن جارىسقان ۇنايدى. قاراپايىم دروندار مەن سيمۋلياتورلارعا قاراعاندا، جارىس دروندارى الدەقايدا شاپشاڭ. 2022-جىلى ۇيىرمەگە العاش كەلدىم. بىرتىندەپ قىزىعۋشىلىعىم ارتىپ، بۇل سپورتپەن اينالىسا باستادىم. ويتكەنى درون جارىسى ءارى ادەمى، ءارى وتە جىلدام وتەدى، - دەيدى جاس سپورتشى.
دروندى باسقارۋ سىرت كوزگە وڭاي كورىنگەنىمەن، وعان ۇزاق دايىندىق قاجەت. جاتتىقتىرۋشىنىڭ ايتۋىنشا، وقۋشىلار الدىمەن ارنايى سيمۋلياتورلاردا جاتتىعادى. كەيىن شاعىن درونداردى باسقارىپ ۇيرەنىپ، سودان سوڭ عانا جارىسقا ارنالعان ۇلكەن اپپاراتتارعا كوشەدى. بۇعان قوسا، ولار دروندى قۇراستىرىپ، باپتاۋدى دا مەڭگەرەدى.
- ءاليحان دروندى ءوزى باپتاپ، باسقارا الادى. مۇنداي ۇيىرمەلەردە بالالار تەك ۇشقىشسىز اپپاراتتى باسقارۋدى عانا ەمەس، ونى قۇراستىرۋدى دا ۇيرەنەدى. بۇل ولاردىڭ شىدامدىلىعىن، زەيىنىن جانە لوگيكالىق ويلاۋ قابىلەتىن دامىتادى، — دەدى جاتتىقتىرۋشىسى.
ءقازىر ۇيىرمەدە ورال قالاسىنداعى بالالارمەن قاتار، وبلىستىڭ 12 اۋدان ورتالىعىنان كەلگەن وقۋشىلار ءدا بىلىم الادى. ولاردىڭ اراسىندا اۋىل بالالارى دا بار. جاتتىقتىرۋشىنىڭ ايتۋىنشا، بالالاردىڭ درون سپورتىنا قىزىعۋشىلىعى جىل سايىن ارتىپ كەلەدى. وقۋشىلاردىڭ شەبەرلىگىن شىڭداۋ ءۇشىن وبلىستىق جارىستار دا ۇيىمداستىرىلادى.
مامان درون تەحنولوگيالارىن تەك سپورتپەن بايلانىستىرۋعا بولمايتىنىن ايتادى. ونىڭ سوزىنشە، بۇل داعدى اۋىل شارۋاشىلىعى، قاۋىپسىزدىك، مەديتسينا جانە كينويندۋستريا سياقتى كوپتەگەن سالادا قاجەت. سوندىقتان بالالاردى درون باسقارۋعا ۇيرەتۋ — بولاشاقتا سۇرانىسقا يە تەحنولوگيالاردى مەڭگەرۋدىڭ ءبىر جولى.
ءال اليحاننىڭ الداعى ماقساتى ايقىن. ول بولاشاقتا الەم چەمپيونى اتانعىسى كەلەدى. ال ماماندىق تاڭداۋ تۋرالى ازىرگە ناقتى شەشىم قابىلداماعان.
بۇعان دەيىن استانالىق ستۋدەنتتىڭ اۋىلشارۋاشىلىق درونىن ويلاپ تاپقانى تۋرالى جازعان ەدىك.
