شىمكەنتتە ءسابيىن 12 جىل كۇتكەن جۇكتى كەلىنشەكتىڭ ىشىنەن 50 شاقتى تاس شىقتى
اياعى اۋىر ايەلدىڭ وسىنشاما ارتىق زاتتى قايدان جيناپ العانى بەلگىسىز.
اۋرۋحاناعا وتە قيىن جاعدايدا جەتكىزىلگەن وعان دارىگەرلەر شۇعىل وتا جاساپ، ءوزى مەن ءسابيىن امان الىپ قالدى.
بۇل تۋرالى ەۋرازيا ءبىرىنشى ارناسى حابارلايدى.
فەرۋزا قۇلابدۋللايەۆا دەرتىنەن ەندى ايىقتى. ول تۋىستارىمەن كەشە عانا كەزدەسكەن. بارلىعى جاس انانى ءسابيلى بولۋىمەن قۇتتىقتاۋدا. ەكىنشى ءسابيىن 12 جىل كۇتكەن ايەل جۇكتى بولعانى سول ەكەن، دەنساۋلىعى ناشارلاي باستاپتى.
«ول تاس ءۇشىن نەشە رەت جەدەل جاردەممەن كەلدىم. 12 جىلدا كورگەن بالام، شىدايىن دەدىم. قانشاما شىدادىم»، - دەيدى كەلىنشەك.
34 جاستاعى فەرۋزانىڭ بار ارمانى ءسابيىن امان-ەسەن بوسانۋ بولاتىن. ءبىراق دەنساۋلىعى قايتا-قايتا سىر بەرە باستاپتى. ەڭ سوڭىندا جاعدايى ناشارلاپ، توسەك تارتىپ جاتىپ قالعان. اۋرۋحاناعا جەتكەندە، دارىگەرلەر ونىڭ ءون-بويىندا بىرنەشە تاس جيناقتالىپ قالعانىن انىقتاپتى. ءسويتىپ شۇعىل وتا جاساعان. ەڭ الدىمەن، كەسىر تىلىگى ارقىلى ىشتەگى بالانى الىپ شىققان. مۇنان كەيىن وتتەگى تاستى الىپتى. ساناعاندا ءبىر ەمەس، 50 تاس شىعىپتى. دارىگەرلەر ءسال كەشىككەندە ءسابي تۇگىلى جاس انانىڭ وزىنەن دە ايىرىلىپ قالار ەدىك دەيدى.
«ءبىرىنشى كەسىر تىلىگى ارقىلى بالاسىن الىپ، ەكىنشى كەزەڭدە ءوت جولدارىن اشىپ، ءوتتىڭ ءجۇرۋىن قامتاماسىز ەتۋ بويىنشا وتا جاسالۋى كەرەك بولدى. ءسويتىپ سونداي شەشىمگە كەلىپ، ناۋقاستىڭ وزىنە، تۋىستارىنا ايتىپ، بىرلەسكەن وتا بولدى»، - دەيدى قالالىق جەدەل جاردەم اۋرۋحاناسىنىڭ باس دارىگەرىنىڭ ورىنباسارى تالعات شاۋەنوۆ.
دارىگەردىڭ سوزىنشە، ناۋقاستىڭ ءوت جولى مەن ءوت قاپشىعىندا پايدا بولعان تاستاردان جۇكتى ايەل ۋلانىپ، دەنەسىنىڭ بارلىعى سارعايىپ كەتكەن كورىنەدى. وتا كەزىندە ونىڭ بارلىعى الىنىپ تاستالعان.
«بالانى ءتۇسىرىپ الامىن با دەپ قورىقتىم. قۇدايعا شۇكىر، امان-ەسەن بوساندىم. دارىگەرلەرگە راحمەت. مەنى دە، بالامدى دا امان الىپ قالدى»، - دەيدى جاس بوسانعان انا فەرۋزا قۇلابدۋللايەۆا.
جاڭا تۋعان سابيگە ءبىلال دەگەن ات قويىلىپتى. قازىر اناسى مەن ءسابيدىڭ دەنساۋلىعى جاقسى. تۋىستارى دا بىلىكتىلىگى جوعارى دارىگەرلەرگە العىستان باسقا ايتارىمىز جوق دەپ وتىر.
