قازاقستاندا كىمدەر 12- قىركۇيەكتەن باستاپ 2 ميلليون تەڭگەگە دەيىن الا الاتىنى ايتىلدى
وتباسى بانكىندەگى دەپوزيتتەر بويىنشا وتەماقى الۋعا وتىنىشتەردى قابىلداۋ 2022-جىلدىڭ 1- قازانىنان باستالادى. ال سالىمدار بويىنشا قاراجاتتى ەسەپتەۋ ءتارتىبى 12- قىركۇيەكتە كۇشىنە ەنگەن جەكە تۇلعالاردىڭ تەڭگەمەن سالىنعان دەپوزيتتەرى بويىنشا وتەماقى تولەۋ قاعيداسىمەن رەتتەلەدى.
وتباسى بانكىندە دەپوزيتى بار قازاقستاندىقتار ۇلتتىق بانك پەن ۇكىمەتتىڭ تەڭگەلىك سالىمداردى قورعاۋ باعدارلاماسىنا قاتىسادى. ياعني وتباسى بانك سالىمشىلارى 2022-جىلدىڭ 23- اقپانىنداعى جاعداي بويىنشا جيناقتالعان ءوز سالىمدارىنا 10 پايىز كولەمىندە وتەماقى الا الادى دەگەن ءسوز.
سالىمدار بويىنشا قاراجاتتى ەسەپتەۋ ءتارتىبى بۇگىن كۇشىنە ەنگەن جەكە تۇلعالاردىڭ تەڭگەمەن سالىنعان دەپوزيتتەرى بويىنشا وتەماقى تولەۋ قاعيدالارىمەن رەتتەلەدى.
10 پايىز كولەمىندە وتەماقى تولەنەتىن ەڭ جوعارعى سوما - 20 ميلليون تەڭگە. بۇل ءبىر بانكتە اشىلعان بارلىق دەپوزيتتىڭ جالپى سوماسى. ياعني بۇل جاعدايدا 2 ميلليون تەڭگە وتەماقى الۋعا بولادى. بانك مالىمەتىنە، 2022-جىلدىڭ 23- اقپانىنداعى جاعداي بويىنشا وتباسى بانكىندە جالپى كولەمى 1,6 تريلليون تەڭگەگە 2,3 ميلليون جيناق شوتى بولدى.
«بەكىتىلگەن ەرەجەگە سايكەس، وتەماقى ءوتىنىش بەرۋ ارقىلى تولەم كەلىسىمىن راستاعان سالىمشىلارعا عانا تولەنەدى. بۇل پروتسەستى ونلاين رەجيمدە ىستەۋگە بولادى.
وتىنىشتەردى 2022-جىلدىڭ 1- قازانىنان باستاپ 2023-جىلدىڭ 1- قاڭتارىن قوسا العاندا www.otbasybank.kz مەكەنجايى بويىنشا باسپانا ماركەت جىلجىمايتىن مۇلىك پورتالىنداعى جەكە كابينەتتە بەرۋگە بولادى»، - دەپ ءتۇسىندىردى «وتباسى بانك» ا ق باسقارما ءتورايىمى ءلاززات يبراگيموۆا.
وتەماقى ەسەپتەلگەنگە دەيىن دەپوزيتىن ساقتاعان سالىمشىلارعا عانا وتەماقى تولەنەدى.
سالىمدى ءبولۋ ارقىلى اقشا دەپوزيتتەن ءىشىنارا الىنعان بولسا، وندا وتەماقى جيناقتالعان سالىمنىڭ ەڭ از قالدىعىنا ەسەپتەلەدى. ونىڭ ۇستىنە 2022-جىلدىڭ 23- اقپانىنان كەيىن سالىمعا تولىقتىرىلعان قاراجات ەسەپكە الىنبايدى.
ەگەر بانك سالىمشىسىندا ارالىق جانە الدىن الا تۇرعىن ءۇي زايمدارىن الۋ ماقساتىندا، ونىڭ ىشىندە ءۇشىنشى تۇلعالاردىڭ مىندەتتەمەلەرى بويىنشا دەپوزيت قامتاماسىز ەتۋ رەتىندە بەرىلگەن سالىمى بولسا، وندا ول دا ءتيىستى وتەمدى الادى.
جاقىن تۋىستارعا (تەگىن) تاعايىندالعان سالىمدار، سونداي-اق بىرىكتىرىلگەن دەپوزيتتەرگە دە وتەماقى بەرىلەدى.
وتەماقى كىمدەرگە بەرىلمەيدى؟
- دەپوزيت جابىلسا؛
- 2022-جىلدىڭ 24- اقپانىنان باستاپ 2023-جىلدىڭ 23- اقپانىنا دەيىنگى كەزەڭدە (قوسا العاندا) دەپوزيت بويىنشا تۇرعىن ءۇي زاەمىنا كوشكەن، ونىڭ ىشىندە اۆتوماتتى تۇردە كوشكەن سالىمدار بويىنشا؛
- ونلاين تابىستاۋ ارقىلى ساتىلعان نەمەسە ساتىپ الىنعان دەپوزيتتەر بويىنشا.
ءتيىستى وتەماقى سوماسىن 2022-جىلدىڭ 1- قازانىنان باستاپ باسپانا ماركەت جىلجىمايتىن مۇلىك پورتالىنداعى www.otbasybank.kz جەكە كابينەتتەن بىلۋگە بولادى. وتەماقى سوماسى ونى قاراۋ كۇنى بويىنشا اكتۋالدى (سالىمشى ورىندايتىن وپەراتسيالارعا بايلانىستى وزگەرۋى مۇمكىن).
وتەماقى سالىمشىلارعا 2023-جىلدىڭ 23- اقپانىنان كەيىن، وتباسى بانكىگە اقشا تۇسكەن ساتتەن باستاپ 2 جۇمىس كۇنى ىشىندە دەپوزيتتەرگە اۋدارىلادى. وتەماقى الۋ ءۇشىن بولەك شوت اشۋدىڭ قاجەتى جوق.
ەگەر سالىمشىنىڭ جالپى قالدىق سوماسى 20000000 تەڭگەدەن اساتىن ەكى جانە ودان دا كوپ دەپوزيتتەرى بولعان جاعدايدا، وتەماقى سالىمدار سوماسىنا پروپورتسيونالدى، ءبىراق بەلگىلەنگەن وتەماقى سوماسىنان اسپايتىن دەپوزيتتەرگە ەسەپتەلەدى.
وتەماقىلاردى ەسەپتەۋ مىسالدارى:
1№ مىسال
دەپوزيت سوماسى 2022-جىلدىڭ 23- اقپانىنىڭ اياعىندا 600 مىڭ تەڭگە بولدى دەلىك. ءبىر جىلدىڭ ىشىندە ءسىز دەپوزيتىڭىزدى ەكىگە ءبولىپ، بىرەۋىن جاۋىپ تاستادىڭىز. دەپوزيتتە ساقتالعان قاراجاتتىڭ قالدىعى بويىنشا ىنتالاندىرىلاتىن مينيمالدى سوما 300000 تەڭگە. وتەماقى 2022-جىلدىڭ 24- اقپانىنان 2023-جىلدىڭ 23- اقپانىنا دەيىنگى ارالىقتا ەڭ تومەن دەپوزيت سوماسىنا ەسەپتەلەتىن بولادى. ياعني، 300000 تەڭگەگە 10 پايىز كولەمىندە وتەماقى اۋدارىلادى، ياعني 30 مىڭ تەڭگە وتەماقى الاسىز.
2№ مىسال
2022-جىلدىڭ 23- اقپانىنداعى كۇننىڭ اياعىندا دەپوزيتىڭىزدىڭ سوماسى 600 مىڭ تەڭگە بولسا، ءبىر جىل ىشىندە ءسىز سالىمىڭىزداعى قاراجاتتى شەشپەي، تولىقتىرىپ وتىردىڭىز دەلىك. 2023-جىلدىڭ 24- اقپانىندا دەپوزيتىڭىزدەگى سوما 1000000 تەڭگەگە جەتتى.
بۇل جاعدايدا سالىمىڭىزداعى 600000 تەڭگەگە 10 پايىز كولەمىندە وتەماقى تولەنەدى، دەمەك 60 مىڭ تەڭگە وتەماقى الاسىز.
3№ مىسال
سىزدە جالپى سوماسى 24 ميلليون تەڭگە بولاتىن بىرنەشە دەپوزيت بار. وتەماقى دەپوزيتتەردىڭ جالپى سوماسى 20 ميلليون تەڭگەگە ەسەپتەلەتىن بولادى. ياعني 4 ميلليون تەڭگەگە وتەماقى تولەنبەيدى. بۇل جاعدايدا وتەماقى 2 ميلليون تەڭگە بولادى.
