كوروناۆيرۋس: قازاقستاندا ۆاكسينا الا الاتىن 12-18 جاستاعى 1,7 ميلليون بالا بار

نۇر-سۇلتان. قازاقپارات - ق ر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا نەلىكتەن Pfizer- ءدىڭ 4 ميلليون دوزاسى ساتىپ الىناتىنىن ءتۇسىندىردى، دەپ حابارلايدى قازاقپارات ءتىلشىسى.

«Pfizer ەڭ الدىمەن، بالالار مەن جۇكتى ايەلدەرگە ارنالعانىن بۇعان دەيىن دە ايتقان ەدىك. ويتكەنى، ول بۇل ساناتقا كىرەتىن ادامداردى قورعايتىن جالعىز ۆاكسينا بولىپ تۇر. ياعني، بۇل وتە ءالجۋاز توپ سانالادى. مۇنىڭ ۇستىنە كوروناۆيرۋس جۇكتى ايەلدەردە قانشالىقتى اۋىر وتەتىندىگىن دە بىلەمىز. ونى دالەلدەيتىن مالىمەتتەر دە قولىمىزدا بار. قازىر بالالار وفلاين وقۋعا كوشتى. دەمەك، كوروناۆيرۋس ينفەكتسياسىن جۇقتىرۋ قاۋپى ايتارلىقتاي ارتىپ وتىر. سوندىقتان ەڭ ءبىرىنشى كەزەكتە بالالار مەن جۇكتى ايەلدەر ەكپە الادى»، - دەدى ول.

وسى رەتتە كوميتەت ءتوراعاسى نەلىكتەن Pfizer- ءدىڭ 2 ميلليون ادامعا جەتەتىن 4 ميلليون دوزاسىن ساتىپ الۋ كەلىسىمى جاسالعانىن ءتۇسىندىرىپ ءوتتى.

«ستاتيستيكالىق مالىمەتتەرگە سايكەس، بۇگىندە كەلىسىمى بولعان كەزدە ۆاكسينا الا الاتىن 12 مەن 18 جاستاعى 1 ميلليون 700 مىڭ بالا بار. ال ەلىمىزدە جىل سايىن 400 مىڭنان استام ايەل بوسانادى. وسى سانداردى قوسقان كەزدە اتالعان ساناتقا كىرەتىن حالىقتى ۆاكسينالاۋعا قاجەتتى Pfizer دوزاسى شىعادى»، - دەدى كوميتەت ءتوراعاسى.