استانادا سۋعا كەتكەن 12 ادامنىڭ 11 ى ماس بولعان
استانا. قازاقپارات - جىل باسىنان بەرى استانا قالاسىنىڭ سۋ ايدىندارىندا 12 ادام سۋعا كەتتى، ولاردىڭ بارلىعى دەرلىك الكوگولدى ىشىمدىككە ماس بولعان، دەپ حابارلايدى «قازاقپارات» ح ا ا ءتىلشىسى.
«العاشقى جارتىجىلدىقتا استانا اۋماعىندا 12 ادام سۋدا مەرت بولدى، ونىڭ بىرەۋى جاس ءسابي بولسا، قالعان 11 ى ماس كۇيىندە سۋعا تۇسكەن ەرەسەكتەر»، - دەدى استانا اكىمدىگىندە وتكەن بريفينگتە استانا قالاسى توتەنشە جاعدايلار دەپارتامەنتىنىڭ باستىعى، ازاماتتىق قورعاۋ پولكوۆنيگى بارات دۇزاقبايەۆ - شىنىندا دا بيىلعى اپتاپ ىستىقتىڭ بەتى قايتار ەمەس، قالا حالقى سۋدا شومىلىپ، سالقىنداعىسى كەلەدى.
دەگەنمەن، استانا اۋماعىندا شومىلۋعا رۇقسات بەرىلگەن 3 ورىن عانا بار، ولار - ورتالىق جاعاجاي، «تري پەسكاريا» جانە «ستوليچنىي دۆور». دەپارتامەنت باسشىسى اتالعان جاعاجايلاردىڭ ادام ومىرىنە قاۋىپسىز بىردەن-ءبىر شومىلۋ ورىندارى ەكەنىن باسا ايتتى.
«شومىلۋ ماۋسىمى اشىلماي تۇرىپ، سۇڭگۋىرلەر رۇقسات بەرىلگەن ورىندارداعى سۋ ءتۇبىن تەكسەرىپ جانە ادامنىڭ جۇزۋىنە كەدەرگى كەلتىرەتىن قوقىستاردان، بۇتاقتاردان، شولمەك سىنىقتارىنان تازارتادى. ياعني، ادام جاراقات الماۋى ءۇشىن جاعاجاي الدىن الا ازىرلەنەدى.
بيىل مەرت بولعان 12 ادامنىڭ بارلىعى شومىلۋعا رۇقسات ەتىلمەگەن جاعادا سۋعا تۇسكەن. ءبىز تاۋىپ العان ءۇش ءمايىت تە الكوگولدى ىشىمدىككە ماس بولعان جانە سۋ استىنداعى بۇتاقتارعا ءىلىنىپ قالىپ، كەرى شىعا الماعان»، - دەپ تولىقتىردى ول.
سونداي-اق، بريفينگ سپيكەرلەرى ەلوردانىڭ شومىلۋعا رۇقسات بەرىلگەن ورىندارىندا كەزەكشىلىك ۇيىمداستىرىلعانىن، وعان 20 ادام مەن 9 كاتەر جۇمىلدىرىعانىن اتاپ ءوتتى. ۇزدىكسىز كەزەكشىلىك پەن ەسكەرتۋ جۇمىستارىنىڭ ناتيجەسىندە سوڭعى ايدا بۇل ورىنداردا قايعىلى وقيعالار تىركەلمەگەن.
اۆتور: ايجان سەرىكجان قىزى
