ءۇندىستاندىق 12 جاستاعى بالانىڭ جۇرەگى 10 جاسار قازاق قىزىنىڭ كەۋدەسىندە سوعاتىن بولدى

استانا. قازاقپارات - 15- تامىز كۇنى ءۇندىستاندا اكەسىمەن بىرگە جول اپاتىنا ءتۇسىپ قازا تاپقان 12 جاستاعى اديز دەگەن بالانىڭ جۇرەگى ەندى 10 جاسار قازاق قىزىنىڭ كەۋدەسىندە سوعاتىن بولدى.
None
None

 جول اپاتىندا قازا بولعان بالانىڭ جۇرەگى چەنناي اۋرۋحاناسىندا ءتورت ايدان بەرى دونور كۇتىپ جاتقان ديلناز يسانعا ترانسپلانتاتسيالاندى.

بۇل تۋرالى «Тhe times of India» سايتى چەنناي قالاسىنان حابارلاعان.

«10 جاسار قازاقستاندىق قىزعا كەرالا شتاتىندا قازا تاپقان بالانىڭ جۇرەگى سالىندى» دەگەن تاقىرىپتاعى اقپارات بەرە وتىرىپ، اگەنتتىك بالانىڭ جول اپاتىندا كوز جۇمعانىن حابارلاعان.

 «ءتورت ايدان بەرى ءۇندىستاندا دونور كۇتىپ، ومىردەن كۇدەرىن ۇزبەگەن 10 جاسار قازاقستاندىق قىزعا سەيسەنبى كۇنى ساۋ جۇرەك تابىلدى. وعان كەرالا شتاتىنداعى بالانىڭ جۇرەگى ترانسپلانتاتسيالاندى. دارىگەرلەر 10 جاسار قازاق قىزىنا ۇلكەن كارديوميوپاتيا دياگنوزىن قويعان. ياعني، جۇرەك وتە ءالسىز جانە قان اينالىمىن كوتەرە الماي كەز كەلگەن ساتتە توقتاپ قالۋى مۇمكىن ەدى.

ال، بۇل ساتتە «فورتيك» اۋرۋحاناسىنىڭ دارىگەرلەرى اكەسىمەن بىرگە جول اپاتىنا ءتۇسىپ، اۋىر جاراقاتتانعان 12 جاستاعى اديز پولسوننىڭ ءومىرى ءۇشىن كۇرەسكەن ەدى. ءبىراق اجالعا ارا تۇسە المادى. ءاديزدىڭ اناسى بالاسىنىڭ ساۋ ورگاندارىن الۋعا رۇقسات بەرگەن. اۋرۋحانا ماماندارى بىردەن كەرالا شتاتى مەن باسقا دا شتاتتاردىڭ اۋرۋحانالارىنا ورگاندار تۋرالى حابارلاما جىبەرەدى. ءۇندىستان بويىنشا ءاديزدىڭ جۇرەگى ءدال كەلەتىن ناۋقاس بولماعان سوڭ، ورگاندى قازاقستاننان كەلگەن قىزعا بەرۋ تۋرالى شەشىم قابىلداندى. فورتيس اۋرۋحاناسىنىڭ دارىگەرلەرى ايتقانداي، ولار اۋەجايدان تۇسە سالا «جاسىل ءدالىز» ارقىلى ءوتىپ، چەنناي اۋرۋحاناسىنداعى قىزعا وپەراتسيا جاساي باستاعان»، - دەپ جازادى «Тhe times of India» سايتى.

10 جاستاعى قازاق قىزىنىڭ جاعدايىن ءبىلۋ ءۇشىن ق ر سىرتقى ىستەر مينيسترلىگىنە حابارلاستىق. «قازىر ءوز قاراجاتى ەسەبىنەن شەت ەلدەردە، سونىڭ ىشىندە ءۇندىستاندا دا ەمدەلىپ جاتقان قازاقستاندىقتار كوپ. ولاردىڭ كەيبىرەۋى ەلشىلىكتە تىركەلمەيدى دە. سوندىقتان، وسى وپەراتسيا تۋرالى ەلشىلىكتەن حابار بولسا، جاريالايمىز»، - دەدى باسپا ءسوز قىزمەتىنىڭ وكىلى.

اۆتور: كەنجەكەي توقتامۇرات قىزى

سوڭعى جاڭالىقتار