رەسەي قازاقستاندىق قۇبىرلار ارقىلى 11 جىل قىتايعا مۇناي ەكسپورتتايدى

استانا. قازاقپارات - 2013-جىلى جاسالعان قازاقستان ارقىلى رەسەي مۇنايىن قىتايعا تاسىمالداۋ تۋرالى كەلىسىمنىڭ مەرزىمى 2034-جىلعا دەيىن ۇزارتىلادى. ءتيىستى قۇجات «اشىق» ن ق ا پورتالىندا جاريالاندى، دەپ حابارلايدى قازاقپارات ءتىلشىسى.

«قازاقستان رەسەي تاراپىنىڭ ۋاكىلەتتى ۇيىمىنىڭ جىلىنا 10 ميلليون توننا كولەمىندە رەسەيلىك مۇنايدى ۇزاق مەرزىمدى تاسىمالداۋى ءۇشىن جاعداي جاسايدى. اتاپ ايتقاندا، «تۋيمازى - ومبى - نوۆوسيبيرسك-2» ماگيسترالدىق مۇناي قۇبىرى، پريرتىشسك (رەسەي مەن قازاقستان شەكاراسى) - اتاسۋ (قازاقستان) - الاشاڭقاي (قىتاي حالىق رەسپۋبليكاسى) تاسىمالداۋ باعىتى بويىنشا ماگيسترالدىق قۇبىرلار جۇيەسىنە قول جەتكىزۋ قۇقىعىن بەرەدى»، - دەلىنگەن قۇجاتتا.

كەلىسىم جوباسىندا جازىلعانداي، رەسەي تاراپى قۇبىر ارقىلى تاسىمالدانعان مۇنايدىڭ ءار تونناسى ءۇشىن قازاقستانعا 2,1 دوللار اقشا تولەيدى.

«رەسەي تاراپىنىڭ ۋاكىلەتتى ۇيىمىنا زاڭدى نەگىزدە تيەسىلى جىلىنا 10 ميلليون توننا مولشەرىندەگى مۇناي تاسىمالداۋ قۇنى ءبىر توننا ءۇشىن 2,1 ا ق ش دوللارىن قۇرايدى جانە ونى قازاقستان تاراپىنىڭ ۋاكىلەتتى ۇيىمى تولەمگە تاپسىرما بەرگەن كۇنى ق ر ۇلتتىق بانكى بەلگىلەگەن تەڭگەگە شاققانداعى اقش دوللارىنىڭ باعامى نەگىزىندە تەڭگەمەن تولەيدى»، - دەپ كورسەتىلگەن قۇجاتتا.

كوپشىلىك تالقىلاۋعا شىعارىلىپ وتىرعان كەلىسىم 2034-جىلدىڭ 1- قاڭتارىنا دەيىن قولدانىلادى.