قاڭتار وقيعاسى بويىنشا ۇ ق ك 11 قىزمەتكەرى جاۋاپقا تارتىلىپ جاتىر
«قازىرگى كەزدە ۇلتتىق قاۋىپسىزدىك كوميتەتىندە 11 قىزمەتكەر قىلمىستىق جاۋاپكەرشىلىككە تارتىلىپ جاتىر. كەيبىر ىستەر بويىنشا تەرگەۋ اياقتالدى، كىنالىلەر قىلمىستىق جاۋاپكەرشىلىككە تارتىلدى. بۇل (قاڭتار وقيعاسى بويىنشا) قىلمىستىق قۋدالاۋعا بايلانىستى»، - دەدى م. قالقابايەۆ دەپۋتاتتاردىڭ سۇراعىنا جاۋاپ بەرە وتىرىپ.
وسى ورايدا سپيكەر قاڭتار وقيعاسىنان كەيىن كوميتەت قۇرامىندا ءتيىستى تەكسەرۋ جۇرگىزىلگەنىن ايتتى.
«سونىمەن قاتار، قاڭتار وقيعاسىنان كەيىن بىردەن ۇلتتىق قاۋىپسىزدىك كوميتەتى اۋقىمدى قىزمەتتىك تەكسەرىس جۇرگىزدى. وسى ورايدا بۇيرىق تالاپتارى مەن قىزمەتتى اتقارۋ تارتىبىنە، ونىڭ ىشىندە لاۋازىمدى تۇلعالاردىڭ جاۋاپكەرشىلىگىنە قاتىستى ەلەۋلى وزگەرىستەر ەنگىزىلدى. مۇنىمەن قوسا، بۇگىن تالقىلانىپ جاتقان زاڭ جوباسىندا ءار قىزمەتكەر ءىس- ارەكەتىنىڭ بەلگىلى ءبىر الگوريتمى مەن پاتريوتيزمدى تاربيەلەۋگە باعىتتالعان ءتيىستى تۇزەتۋلەر كوزدەلگەن»، - دەدى ۇ ق ك وكىلى.
بۇدان بۇرىن حابارلانعانداي، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ۇلتتىق قاۋىپسىزدىكتى قامتاماسىز ەتۋ جانە قازاقستان رەسپۋبليكاسىنىڭ ارناۋلى مەملەكەتتىك ورگاندارىنداعى قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.