الماتىدا 11 جاسار قىزدىڭ اسقازانىنان ءبىر كەلى شاش شىقتى
«بالانىڭ ءىشى اۋىرىپ، ءبىر اپتا بويى قۇسىپ، تابەتى بولماعان. ونى السىزدىك مازالاعان. اۋرۋحاناعا جاتقىزىلعانعا دەيىن اسقازان- ىشەك جولدارىنىڭ بۇزىلۋىنا بايلانىستى امبۋلاتورلىق ەم قابىلداعان. 1- اقپاندا بالا جەدەل اپپەنديتسيتكە كۇدىكپەن قابىلداۋ بولىمىنە جەتكىزىلدى. ول دياگنوز ديناميكالىق باقىلاۋ بارىسىندا راستالمادى»، - دەدى بالالار شۇعىل مەديتسينالىق كومەك كورسەتۋ ورتالىعىنىڭ ءىرىڭدى جانە كەۋدە حيرۋرگياسى ءبولىمىنىڭ مەڭگەرۋشىسى ساماتبەك مىرزاحمەت.
بالاعا شۇعىل تۇردە ءىش قۋىسى مۇشەلەرىنە ۋلترادىبىستىق زەرتتەۋ، ەزوفاگوگاسترودۋودەنوسكوپيا جاسالدى.
اسپاپپەن تەكسەرۋ ساتىسىندا اسقازان كولەمدى ەحو- تەرىس زاتپەن تولىپ تۇرعانى بەلگىلى بولعان.
«زەرتتەۋ ناتيجەسى اسقازان قۋىسىندا كولەمدى ءتۇزىلىستىڭ بارىن كورسەتتى: اسقازاندا كوپتەگەن گەتەروگەندى بولشەكتەن، شاش ورىمىنەن جانە شىرىشتان تۇراتىن جانە اسقازاننىڭ بۇكىل كولەمىن تولتىرىپ تۇرعان لاس قارا ءتۇستى بوگدە دەنە انىقتالدى. قورىتىندى دياگنوز - اسقازاننىڭ تريحوبەزوارى»، - دەدى ءبولىم مەڭگەرۋشىسى ساماتبەك مىرزاحمەت.
دارىگەرلەر قىزعا ناركوزبەن لاپاروتوميا، گاستروتوميا، اسقازاننان بوگدە زاتتى الىپ تاستاۋ وتاسىن جاسادى.
«اسقازان قۋىسىندا 16x6x5 س م، سالماعى 1000 گ ۇلكەن كولەمدەگى تىعىز، كوپتەگەن شاشتان تۇراتىن تاماق ماسساسى مەن شىرىش جابىسقان كونگلومەراتپەن بەينەلەنگەن بوتەن دەنە، تريحوبەزوار تابىلىپ، شىعارىلدى»، - دەدى ب ش م ك ك و بالالار حيرۋرگى ساۋلە سۇلەيمانوۆا.
دارىگەرلەردىڭ ايتۋىنشا، جۇتۋ ناتيجەسىندە اسقازان- ىشەك جولىنا تۇسەتىن بوگدە دەنەلەر بەزوارلار دەپ اتالادى. ەڭ كوپ كەزدەسەتىنى وسىمدىك تەكتەس فيتوبەزوارلار. ولاردىڭ پايدا بولۋ سەبەبى - جاڭعاق، ءىنجىر، ءجۇزىم، شابدالى، تسيترۋس جەمىستەرى جانە تاعى باسقاسى. ورگانيكالىق تەكتى بەزوارلار كەيبىر دارىلىك زاتتار، لاك، شايىردى جۇتقاندا اسقازاندا تۇزىلەدى.
«پەدياتريا تاجىريبەسىندە شاش نەمەسە جۇننەن پايدا بولعان اسقازانداعى تۇزىلىمدەر ەرەكشە قىزىعۋشىلىق تۋدىرادى. مۇنداي بەزوارلار شاش، قاس جانە كىرپىگىن جۇلىپ، جۇتاتىن پاتولوگيالىق بەيىمدىلىگى بار قىزداردا كەزدەسىپ، تريحوتيللومانيا دەپ اتالادى»، - دەدى مەديتسينا ساۋلە سۇلەيمانوۆا.
الماتى بالالار شۇعىل مەديتسينالىق كومەك كورسەتۋ ورتالىعىنىڭ مالىمەتىنشە، 2023 -جىلى «اسقازاننىڭ تريحوبەزوارى» دياگنوزى قويىلعان بۇل العاشقى جاعداي.
اۆتور
دۋمان ارعىنگەلدى