پاۆلودار وبلىسىنا قانداستارىمىزدان 11 وتباسى كوشىپ كەلدى
وڭىرىمىزگە 11 وتباسىنىڭ قۇرامىندا 46 ادام كەلدى. «دوستىق» ۇيىندە وتكەن جيىندا ءار اۋدان، قالالاردىڭ جۇمىسپەن قامتۋ ورتالىقتارىنىڭ باسشىلارى كەلىپ، قانداستارعا بوس جۇمىس ورىندارى، قانداي جاعداي جاسالاتىنى تۋرالى تانىستىردى.
دۇنيەجۇزى قازاقتارى قاۋىمداستىعى «وتانداستار قورى» پاۆلودار وبلىستىق فيليالىنىڭ باسشىسى بولات زاۋىت جىل باسىنان بەرى رەسەي، مونعوليا، وزبەكستان ەلدەرىنەن 216 ادام كوشىپ كەلگەنىن اتاپ ءوتتى.
«بيىل پاۆلودار وبلىسىنا شەت ەلدەردەن كەلەتىن قانداستارعا 800 ادامعا كۆوتا بولىنگەن. ال، تۇرىكمەنستاننان بيىل 427 قانداس كەلەدى دەپ كۇتىلۋدە. سونىڭ ءبىر بولىگى مىنە كەلىپ وتىر. بۇل وتباسىلار تۇرىكمەنستاننان قازاقستانعا ۆيزانى پاۆلودار وبلىسىنا بارۋ ءۇشىن العان. سوندىقتان قازىر تەك وسى وبلىسقا قونىستانىپ، كەم دەگەندە بەس جىل تۇرۋى ءتيىس. ولاي بولماسا، شارا قولدانىلادى. ونىڭ ءبارىن ەسكەرتىپ ايتتىق»، - دەدى بولات زاۋىت.
ونىڭ ايتۋىنشا، قازاقستانعا قونىس اۋدارعان شەت ەلدەردەگى قازاقتار الدىمەن ج س ن (جەكە سايكەستەندىرۋ ءنومىرىن) الۋى ءتيىس. ول 1 كۇندە بەرىلەدى. كەيىن «قانداس» مارتەبەسىن الادى. ول 4 جۇمىس كۇنى ىشىندە بەرىلەدى. سودان كەيىن وسى وڭىرگە تۇراقتى تىركەۋگە تۇرىپ، ءبىر مەزەتتە قازاقستان ازاماتتىعىنا قۇجات تاپسىرادى. وسى ۇردىستەردەن كەيىن كۆوتاعا قۇجات تاپسىرادى.
پاۆلودار وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى الميرا ديسيۋپوۆا قانداستارعا كۆوتا بويىنشا قانداي كومەك كورسەتىلەتىنىن ايتتى.
«قونىس اۋدارعان وتباسىلاردىڭ ءار مۇشەسىنە 70 ا ە ك مولشەرىندە اقشالاي كومەك بەرىلەدى. بۇل 200 مىڭ تەڭگەدەن اسادى. سونداي-اق قونىستانعان جەرلەرىنە قاراي 1 جىل بويى اي سايىن باسپانا جالداۋعا سۋبسيديا الادى. ەگەر قالالىق جەردە ورنالاسسا، 61 مىڭنان 91 مىڭ تەڭگەگە دەيىن، اۋىلدىق جەردە 45 مىڭنان 64 مىڭ تەڭگەگە دەيىن الادى. ناقتى سوما وتباسىنداعى ادام سانىنا بايلانىستى. سونداي-اق 1 جىلدىق سومانى ءبىر جولدا الىپ، سول باسپانانى ساتىپ الۋعا جۇمساۋعا بولادى»، - دەدى الميرا ديسيۋپوۆا.
باسقارما باسشىسى وبلىستا قانداستارعا ارنالعان بولجامدى كارتا بار ەكەنىن ايتتى. وندا 111 ەلدى مەكەن بەلگىلەنىپ، 1 مىڭنان استام بوس جۇمىس ورنى انىقتالعان.
«كەلگەن وتباسىلار قازىر ماماندىقتارى مەن بوس جۇمىس ورىندارىنا قاراي قاي اۋدانعا باراتىنىن انىقتايدى. ياعني، تۇراتىن جەردى وزدەرى تاڭدايدى. بىزدە ءار اۋداندا كۆوتا بار. قازىرگى ۋاقىتتا ءسال ەرتەرەك كوشىپ كەلگەن وتباسى اقسۋ اۋىلدىق ايماعىن تاڭداپ، تۇراقتاندى. وتاعاسى گاز-ەلەكتر دانەكەرلەۋشى ەكەن. سول ماماندىعى بويىنشا جۇمىس جاساۋدا»، - دەدى الميرا ديسيۋپوۆا.
باسقارما باسشىسىنىڭ ايتۋىنشا، تۇرىكمەنستاننان كوبىنە تەحنيكالىق مامانى بار، سونىڭ ىشىندە گاز-ەلەكتر دانەكەرلەۋشىلەر كەلۋدە. ال، وبلىسقا نەگىزى دەنساۋلىق ساقتاۋ، ءبىلىم سالاسىنىڭ ماماندارى كەرەك، دەگەنمەن ازىرگە ونداي ماماندار كەلىپ جاتقان جوق.
وڭىرىمىزگە قونىس اۋدارعانداردىڭ ءبىرى ماقسات سۇيەسينوۆ اۋىلدىق جەرلەردىڭ بىرىنە بارىپ، مال شارۋاشىلىعىمەن اينالىسۋدى جوسپارلاۋدا.
- تۇرىكمەنستاننىڭ بالقانابات ولكەسىنەن كەلدىك. وتباسىمىزدا ءتورت ادامبىز. ۇلىم مەن قىزىم بار. قىزىم 8-سىنىپتا وقيدى. ءوز ماماندىعىم - ەلەكتريك. جۇبايىم ءۇي شارۋاسىندا. مۇندا ماي اۋدانى مەن اققۋلى اۋدانىنىڭ بىرىنە بارسام دەپ وتىرمىن. مال شارۋاشىلىمەن اينالىسۋعا نيەت بار. ول جاقتا دا مال ۇستاعانمىن. اتا انام وسى قازاقستاندا. پاۆلودار وبلىسى جاقسى ەكەن. قازاقستان كەڭ بايتاق جەر عوي. قاي جەرى بولسا دا ماعان ىڭعايلى، - دەدى ماقسات سۇيەسينوۆ.
ايتا كەتەيىك، تۇرىكمەنستانداعى قانداستار 2020-جىلى قازاقستانعا كوشۋگە نيەت بىلدىرگەن. وندا 20 مىڭعا جۋىق قازاق تۇرادى. الايدا، پاندەمياعا بايلانىستى كەيىنگە شەگەرىلگەن. كوبى وڭتۇستىك وڭىرلەردى تاڭداعان. قازىرگى كەزدە ەلىمىزدە قولدانىستاعى ساياساتقا بايلانىستى قانداستاردى سولتۇستىك وڭىرلەرگە باعىنداتتاۋدا.
