رەسەي، قىرعىز جانە وزبەكستانمەن شەكارادا 11- ساۋىردەن باستاپ بۇكىل شەكتەۋلەر الىنادى

نۇر-سۇلتان. قازاقپارات - ۆ ا ك قازاقستانداعى ەپيدەميولوگيالىق احۋالدىڭ تۇراقتانۋىنا بايلانىستى ءبىرقاتار شەكتەۋدى الىپ تاستاۋ جونىندە شەشىم قابىلدادى، دەپ حابارلايدى قازاقپارات.

ق ر پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىعىمەن قازاقستان رەسپۋبليكاسىنىڭ اۋماعىندا كوروناۆيرۋس ينفەكسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسى ءوتتى.

ەپيدەميولوگيالىق جاعدايدىڭ تۇراقتانۋىن ەسكەرە وتىرىپ، بيىلعى 11- ساۋىردەن باستاپ:

- رەسەي فەدەراتسياسىمەن، وزبەكستان جانە قىرعىزستان رەسپۋبليكالارىمەن قۇرلىقتاعى وتكىزۋ پۋنكتەرىندە ق ر ازاماتتارىنىڭ، ازاماتتىعى جوق ادامداردىڭ جانە شەتەلدىكتەردىڭ قازاقستان رەسپۋبليكاسىنىڭ مەملەكەتتىك شەكاراسىنان وتۋىنە قويىلعان شەكتەۋلەردى الىپ تاستاۋ تۋرالى شەشىم قابىلداندى.

- سونداي-اق اۋە قاتىناسى ارقىلى ق ر مەملەكەتتىك شەكاراسىن كەسىپ وتۋگە قويىلعان بارلىق شەكتەۋلەر الىنىپ تاستالادى.

بۇل رەتتە قازاقستاندىقتار مەن قازاقستان رەسپۋبليكاسىنىڭ اۋماعىندا تۇرۋعا ىقتيارحاتى بار شەتەلدىكتەرگە جانە شەتەل ازاماتتارىنا پ ت ر ادىسىمەن COVID-19-عا تەستىنىڭ تەرىس ناتيجەسى بار انىقتامانى نەمەسە ۆاكتسينالاۋ پاسپورتتارى ءوزارا تانىلعان جاعدايدا COVID-19-عا قارسى ۆاكسينالاۋدىڭ، ريەۆاكسينالاۋدىڭ تولىق كۋرسىنان وتكەنى تۋرالى قۇجاتتى/پاسپورتتى مىندەتتى تۇردە ۇسىنۋ جونىندەگى تالاپ ساقتالادى.

ۆيتسە-پرەمەر ءوز سوزىندە مەملەكەتتىك شەكارانى اشۋ ماسەلەسى مەملەكەت باسشىسىنىڭ تۇراقتى جەكە باقىلاۋىندا ەكەنىن ايتتى.

وتىرىس سوڭىندا ە. توعجانوۆ اكىمدىكتەرگە كوروناۆيرۋس ينفەكسياسىنا قارسى ەگۋ ناۋقانىن ەرەكشە باقىلاۋعا الۋدى تاپسىردى جانە حالىق اراسىندا ساپالى ءتۇسىندىرۋ جۇمىستارىن جۇرگىزۋ قاجەتتىگىن اتاپ ءوتتى.