الماتىدا 11 جاسار بالا وققا ۇشتى

«قازاقستان رەسپۋبليكاسىنىڭ بالالار قۇقىعى جونىندەگى ۋاكىلى ارۋجان سايننىڭ اقپاراتىنا سايكەس، 5-قاڭتار كۇنى الماتىدا وق جاراقاتىنان بالا قايتىس بولدى. اتا-انالارى بالالارمەن سەرۋەندەپ قايتىپ كەلە جاتقاندا وق اتىلىپ، 11 جاستاعى بالا قازا تاپتى. ال 7-قاڭتار كۇنى الماتىداعى بالالار اۋرۋحانالارىنىڭ بىرىنە اۋىر وق جاراقاتىمەن 15 جاستاعى جاس ءوسپىرىم جەتكىزىلدى. دارىگەرلەر ونىڭ ءومىرىن ساقتاپ قالۋ ءۇشىن ارپالىسىپ جاتىر. ەرەسەكتەرگە ارنالعان اۋرۋحانالاردىڭ بىرىندە ونىڭ اكەسى جاتىر. جاس ءوسپىرىم اكەسىمەن بىرگە ماشينادا كەلە جاتقاندا ولاردىڭ كولىكتەرىنە سودىرلار وق اتقان»، - دەلىنگەن بالالار قۇقىقتارى جونىندەگى ۋاكىلدىكتىڭ باسپا ءسوز قىزمەتىنەن.

وسى رەتتە بالالار قۇقىعى جونىندەگى ۋاكىلى ارۋجان ساين اتا-انالار مەن ەرەسەك ادامدارعا بالالاردى قورعاۋعا شاقىرادى.

اۆتور: مارلان جيەمباي