سارىاعاشتا اعايىندى ۇرىلار 11 مىڭ دوللار سالىنعان سەيفتى ۇرلاپ كەتكەن

سارىاعاش. قازاقپارات - تۇركىستان وبلىسىنا قاراستى سارىاعاش اۋدانىندا اعايىندى ەكى جىگىت تۇرعىن ۇيلەردىڭ بىرىنە ۇرلىققا ءتۇسىپ، 11 مىڭ ا ق ش دوللارى سالىنعان سەيفتى ۇرلاپ، وعان قوسا جابىرلەنۋشىنىڭ ۇيىندەگى جاتىن بولمەسىنەن ءتۇرلى التىن بۇيىمدارىن دا قولدى ەتكەن، دەپ حابارلايدى قازاقپارات ءتىلشىسى.

وبلىستىق پ د باسپا ءسوز قىزمەتىنىڭ مالىمەتىنشە، پوليتسياعا ارىزدانعان جابىرلەنۋشىگە جالپى سوماسى 10 ميلليون تەڭگەدەن استام شىعىن كەلگەن. اتالعان قىلمىستى اشپاق بولعان جەدەل ۋاكىلدەر جاقىن ماڭداعى اۋماقتاردى ارالاپ، كۋاگەرلەردەن سۇراستىرعان.

سونىمەن قاتار، بەينەباقىلاۋ كامەرالارىن تەكسەرىپ شىققان. جەدەل-ىزدەستىرۋ شارالارىنىڭ ناتيجەسىندە كۇدىكتى رەتىندە اعايىندى ەكى جىگىت ۇستالعان. ونىڭ بىرەۋى بۇرىن سوتتى بولعانى انىقتالدى. تەرگەۋ بارىسىندا بەلگىلى بولعانداي، اعايىندى ەكەۋ قىلمىستى ءوزارا اقىلداسىپ جاساعان. ولار الدىن الا جابىرلەنۋشىنىڭ ءۇيىن باقىلاپ، ادامداردىڭ جوقتىعىنا كوز جەتكىزگەن سوڭ تەرەزەنى بۇزىپ، ىشىنە كىرەدى. جاتىن بولمەدەگى سەيفتى ۇرلاپ، وقيعا ورنىنان بوي تاسالاعان. قولدى ەتكەن زاتتاردى اۋىل سىرتىنا بارىپ اشىپ، ىشىندەگى ءتۇرلى التىن بۇيىمدار مەن اقشانى قالتالارىنا باسقان. ال، سەيفتى سول جەرگە لاقتىرىپ كەتكەن. وسىلايشا التىنداردى ۇيلەرىنە جاسىرىپ، اقشانى جاراتىپ جىبەرگەن. قوس كۇدىكتى قاماۋعا الىنىپ، تەرگەۋ امالدارى جۇرگىزىلۋدە.

اۆتور: اينۇر اقبايەۆا