11-قازان. قازاقپارات كۇنتىزبەسى

حالىقارالىق قىزدار كۇنى

2012 -جىلى ب ۇ ۇ باس اسسامبلەياسى بەكىتكەن. بۇل كۇندى مەرەكەلەۋدىڭ ماقساتى - بۇكىل الەمدەگى قىزداردىڭ تەڭسىزدىك جانە الەۋمەتتىك ماسەلەلەرىنە نازار اۋدارتۋ. ولاردىڭ ىشىندە ءبىلىم الۋ، تولىققاندى تاماقتانۋ، مەديتسينالىق قىزمەت الۋ، كەمسىتۋشىلىكتەن، زورلىق- زومبىلىقتان، بالا كەزىنەن ماجبۇرلەپ نەكەگە تۇرعىزۋدان قورعاۋ ماسەلەلەرى بار.

دۇنيەجۇزىلىك باسپاناسىز ادامدار كۇنى

العاش رەت 2010 -جىلى اتاپ ءوتىلدى، بارلىق دەرلىك ەلدەرگە قانداي دا ءبىر دارەجەدە قاتىسى بار ادامزاتتىڭ جاھاندىق پروبلەمالارىنىڭ بىرىنە ارنالعان. بۇل كۇننىڭ نەگىزگى مىندەتى - جۇرتشىلىقتىڭ نازارىن باسپاناسىزدىق پروبلەماسىنا اۋدارتۋ، باسپاناسىزداردىڭ ستيگماتيزاتسياسىمەن كۇرەسۋ (كوشەدە قالىپ قويعان ادامداردىڭ بارلىعى ماسكۇنەمدەر مەن ناشارقورلار ەمەس) جانە ادامداردى قانداي دا ءبىر سەبەپپەن ءۇي- كۇيسىز قالعاندارعا كومەك قولىن سوزۋعا جۇمىلدىرۋ.

ەستە قالار وقيعالار

1961 -جىلى سەمەي پوليگونىندا العاش رەت جەراستى يادرولىق جارىلىسى جاسالدى (ك س ر و- نىڭ جەر ۇستىندەگى يادرولىق جارىلىسى دا وسى سەمەي جەرىندە 1949 -جىلى تامىزدىڭ 29-دا جاسالعان بولاتىن) .

1994 -جىلى «قازاقتەلەكوم» ۇ ا ق كومپانياسى قۇرىلدى.

1997 -جىلى قازاقستاندا «قازاقستان-2030» ستراتەگيالىق باعدارلاماسى قابىلداندى.

2011 -جىلى ناگاساكي قالاسىنىڭ (جاپونيا) ءمەرى توميحيسا تاۋە «يادرولىق قارۋسىز الەم» سۋرەت جانە شىعارما بايقاۋىندا جەڭىمپاز اتانعان قازاقستاندىق بالالارعا سىيلىقتار تابىستادى. بايقاۋدىڭ ون ۇزدىك ەسسەسى قازاقستان رەسپۋبليكاسى سىرتقى ىستەر مينيسترلىگىنىڭ سايتىندا جاريالاندى.

2011 -جىلى قاراعاندى وبلىسىنىڭ تۇرعىنى نيكولاي ساۆيدوۆ استانا قالاسىندا ءوتىپ جاتقان مادەنيەت كۇندەرىنە ميكروسكوپپەن عانا كورۋگە بولاتىن ميكروبۇيىمداردى الىپ كەلدى. بالقاش قالاسىنىڭ تۇرعىنى نيكولاي ساۆيدوۆ كولەمى ءبىر ميلليمەتردىڭ وننان ءبىر بولىگىندەي بولاتىن ميكرومينياتيۋرالاردى جاسايتىن قازاقستانداعى جالعىز ادام. جالپى، ونەردىڭ مۇنداي تۇرىمەن الەمدەگى 7 ميلليمارد ادامنىڭ اراسىندا تەك ونداعاندار عانا اينالىسادى. وسىنداي بىرەگەي ونەرىمەن تانىلعان ا ق ش ازاماتى ۋيللارد ۆيگاننان كەزىندە ەلتون دجون 70 تۋىندىنى ساتىپ العان دەسەدى.

2016 -جىلى پاريج قالاسىنداعى يۋنەسكو- نىڭ شتاب- پاتەرىندە الماتىنىڭ 1000 جىلدىعىنا ارنالعان كورمە اشىلدى. كورمە اياسىندا قازاقستان رەسپۋبليكاسىنىڭ تۇڭعىش پرەزيدەنتى - ەلباسى قورىنىڭ «بەلگىسىز قازاقستان» بىرەگەي جوباسى تانىستىرىلدى. ونىڭ باستى ماقساتى قازاقستان رەسپۋبليكاسىنىڭ مادەنيەتى مەن تاريحىن ناسيحاتتاۋ.

2016 -جىلى بۇكىل الەمدىك پوشتا وداعىنىڭ 26-كونگرەسسىندە داۋىس بەرۋ ناتيجەسى بويىنشا قازاقستان 4 -جىلعا اكىمشىلىك كەڭەس مۇشەسى بولىپ سايلاندى.

2017 -جىلى قازاقستان رەسپۋبليكاسىنىڭ ۇلتتىق بانكى «proof» ساپاسىنداعى كۇمىستەن جاسالعان 500 تەڭگەلىك جانە نەيزيلبەردەن جاسالعان 100تەڭگەلىك «قازاقستان حالقىنىڭ ەرتەگىلەرى» سەرياسىنان «نەمىس ەرتەگىسى» ەستەلىك مونەتالارىن شىعاردى (برەمەن تاۋن مۋزىكانتتارى) .

2017 -جىلى قازاقستان ت م د- دا ءبىرىنشى بولىپ ساۋد ارابياسىمەن تۇلعالاردى ەكستراديتسيالاۋ تۋرالى كەلىسىم جاسادى.

2018 -جىلى ت. س. سەگىزبايەۆ اتىنداعى «قايرات» فك اكادەمياسىندا قازاقستانداعى العاشقى «اڭساۋ» بالالار ينكليۋزيۆتى فۋتبول كلۋبىنىڭ تۇساۋكەسەرى ءوتتى.

2018 -جىلى الەمدىك جانە ءداستۇرلى دىندەر كوشباسشىلارى سەزىنىڭ 15 جىلدىعىنا وراي قازاقستان ارنايى ماركا شىعاردى.

2019 -جىلى ماسكەۋدە مۋزىكاتانۋشى- ەتنوگراف، قازاقستاننىڭ حالىق ءارتىسى، «قازاقتىڭ 1000 كۇيى» جيناعىنىڭ اۆتورى الەكساندر زاتايەۆيچتىڭ تۋعانىنا 150 -جىل تولۋىنا بايلانىستى VIII حالىقارالىق عىلىمي كونفەرەنتسيا بولىپ ءوتتى.

2019 -جىلى اقتاۋ قالاسىندا جازۋشى، تانىمال مەملەكەتتىك جانە قوعام قايراتكەرى ءابىش كەكىلباي ۇلىنىڭ مۇراجايى اشىلدى. مۇراجايدا ءابىش كەكىلباي ۇلىنىڭ جەكە زاتتارى مەن وعان ارنالعان كىتاپتار ساقتالعان. الماتىلىقتار مۇراجايعا جازۋشىنىڭ ارحيۆتىك فوتوسۋرەتتەرى بار بىرەگەي البومدى سىيعا تارتتى.