سيريادا 11 جاسىندا تۇرمىسقا شىققان قىزدىڭ مۇڭى

وسى ۋاقىتقا دەيىن «جۋسان-1» وپەراتسياسىنان - 47 ادام، «جۋسان-2» وپەراتسياسىنىڭ ارقاسىندا 231 ادام، «جۋسان-3» وپەراتسياسى ارقىلى 230 عا جۋىق ادام ەلگە قايتتى. سولاردىڭ ىشىندە سالتانات ەسىمدى جاسوسىپىرىمدە بار.  قازىر ونىمەن ماماندار جۇمىس ىستەپ جاتىر.

سالتاناتتى بىزبەن كەزدەسۋگە ارەڭ كوندىردىك. ول بىزگە جارتى ساعات ۋاقىت بەردى. ودان ارتىق سويلەسپەيمىن دەپ شارت قويدى. كوندىك. ءبىز بارعانىمىزدا تەرەزەنىڭ الدىندا تۇر ەكەن. سۇراق قويماستان اڭگىمەسىن باستاپ كەتتى.

«وكىنەم. كوپ قيىنشىلىق كوردىم. بالالىق شاعىمدى وتكىزدىم. قىزىقتى شاعىمدى تەك ۋايىم قايعىمەن وتكىزىپ جىبەرىپپىن» ، - دەدى ول داۋسى دىرىلدەپ.

قارشاداي قىزدىڭ كورمەگەن قورلىعى جوق. نەبارى 15 جاستا بولسا دا، ءومىردىڭ نەبىر سۇمدىعىن باسىنان وتكەرگەن. سول كورگەن ازابى «ەندى قايتالانباسا ەكەن دەگەن» نيەتپەن شىعار.. .شىن ەسىمىن جاسىرىپ، ول ءوزىن سالتانات دەپ تانىستىردى. بال بالالىعىن ۇرلاپ، بۇ دۇنيەنىڭ توزاعىن كورسەتكەن باسقا ەمەس، سالتاناتتىڭ ءوز اناسى. ءبارى ونىڭ لاڭكەستەر ىلاڭ سالىپ جاتقان تاياۋ شىعىسقا تابان تىرەۋىنەن باستالدى. ول كۇندەر سالتاناتتتىڭ اسا ەسىندە جوق. نەبارى 7 جاستا بولاتىن. تەك اناسىنىڭ اياق استىنان بۋىنىپ - ءتۇيىنىپ، الدىمەن تۇركياعا كەيىن سيرياعا قىدىرىپ بارامىز دەگەنى ەسىندە قالىپتى.

- باسقى كەز قاتتى ەسىمدە جوق. كىشكەنتاي بولعان سوڭ تەك بۇرىشتا وتىراتىنمىن ۇلكەندەردىڭ قاسىندا. باسىندا بارعان كەزدە جاقسى قارسى الدى. 3 ايداي جاقسى تۇردىق. سول جەردەگى ادامدار ءبىزدى شەكارادان وتكەندە ماشينامەن كۇتىپ الدى. جارتى جىلدان سوڭ جاۋ جاقىنداپ، ارتقا قاشىپ، 20 كۇندەي دالادا جاتتىق. اۆتوبۋستا، مەشىتتەرگە قوندىق. اش قالعان كۇندەرىمىزدە بولدى.

سالتانات ەسەيگەن سايىن، سيرياداعى جاعداي دا، قيىنداي ءتۇستى. كۇننەن كۇنگە ۇدەگەن جارىلىستار، اۋىل قالانىڭ ءبارىن قيراتتى. حالىق قويشا قىرىلدى. امان- قالعاندارى باس ساۋعالاپ كوشىپ- قونۋمەن الەك بولدى. شىقپا جانىم شىقپانىڭ كۇيىن كەشكەن سالتاناتتىڭ دا قانشا قالادا تۇرعانى ەسىندە جوق. تەك انە- مىنە ءولىپ كەتەم بە دەگەن قاشىپ - پىسقان تىرشىلىكتىڭ قاجىتقانىن ايتادى. قازىر ول قاقتىعىستىڭ قاق ورتاسىنان قالاي امان كەلگەنىنە تاڭ قالادى. ويتكەنى ول جاقتا قولىنا قارۋ ۇستاعان ەرلەر عانا ەمەس. ەشكىمگە زيانى جوق قارتتار مەن بالالاردا ءولىپ جاتىر. ءبىرى- جارىلىستان، ءبىرى اشتىقتان، ال ەندى ءبىرى لاس، تىشقاني تىرشىلىكتەن تۋىنداعان جۇقپالى اۋرۋلاردان.

- ادامدار ءولىپ جاتتى. قازاقتار كوپ بولدى. قاي ۋاقىتتا ولەمىز بىلمەيمىز دايىندالىپ جۇرەدىك. دالادا اداسىپ قالعان بالالار بولدى. ولاردىڭ انالارى قايتىس بولىپ كەتكەن. تۇرىپ جاتقان جەرىمىزدەن قۋىپ جىبەرەتىن. كوپ تاماق جەيسىڭدەر دەپ. قىزداردى تانىمايتىن بىرەۋلەرگە بەرىپ جىبەرەتىن.

سالتاناتتىڭ اناسى سيريادا كوپ قينالىپتى. شام ەلىندە باقىتتى عۇمىر كەشەمىز، ءومىر بويى ءسۇيىپ وتەمىن دەپ الداپ شاقىرعان راديكال ازاماتى الدەقاشان ءولىپ قالعان. ودان بەرى بىرنەشەۋىمەن نەكەلەسكەن ەكەن. ال، بويجەتىپ قالعان قىزىنا قورعان بولا الماعان سوڭ 11 جاسىندا تۇرمىسقا بەرىپتى. جولداسى مەن وتباسىلىق ءومىرى جايىندا، سالتانات اشىپ ايتقىسى كەلمەدى. بولىسۋگە بولمايتىن قۇپياسى بار ما؟ الدە بىتكەن جارانىڭ اۋزىن تىرناعىسى كەلمەدى مە كۇيەۋى تۋرالى ءتىس جارمادى. تەك بالالىق شاعىنىڭ قور بولعانىن ايتا بەردى.

«7 جىل ءومىرىم تۇستەي ءوتتى. ءوز ەلىمدە ءوزىمدى باسقاشا سەزىنىپ باستادىم. بالالىق شاعىمدى قايتارا المايمىن، قىزىق ۋاقىتىمنىڭ ءبارى ءوتىپ كەتىپتى. ەسكە تۇسىرسەم، بومبادان قاشىپ جۇرگەن كەزىم تۇسەدى. ەرتەڭگى كۇنىم قانداي بولادى. قاي جەرگە بارامىز. قانداي ۋاقىتتا ءوتىپ كەتۋىمىز مۇمكىن. قانداي ۋاقىتتا ءولىپ كەتۋىمىز مۇمكىن بىلمەيمىز. ءوزىم دە، جولداسىمدا بىلمەيدى. سونىڭ ارتىنان ەرىپ جۇرە بەردىم. اركىم قارا باسىنىڭ قامىن ويلايدى. ەشكىمنىڭ ەشكىمگە قارايلايتىن مۇرشاسى جوق. اسىرەسە، جەتىمدەر مەن جەسىرلەر قورعانسىزدىڭ كۇيىن كەشەدى. كۇيەۋى ولگەن ايەلدەر لاڭكەستەردىڭ ولجاسى. ۇلىنىڭ قولىنا قارۋ بەرىپ وزدەرى سەكىلدى قانپەزەر قىلادى. ال، اناسى مەن قىزىن قولجاۋلىق قىپ ساۋداعا سالادى» ، - دەيدى ول.

ەلگە ورالۋعا مۇمكىندىك تۋعان ساتتە اناسى تەك سالتاناتتىڭ ءوزىن عانا جىبەرىپتى. بولاشاعى الدا، ءالى- اق وڭالىپ كەتەر دەسە كەرەك. ال ءوزى كىشكەنتاي قىزىمەن بىرگە سيريادا قالىپتى. وتانعا ورالماس بۇرىن سالتانات تا كوپ ويلانىپتى.

«بىزگە شام ەلىندەگىلەر ەلدەرىڭە قايتۋشى بولماڭدار دەيتىن. بارساڭدار قامايدى سەندەردى دەپ قورقىتتى. باسىندا مەندە قورىقتىم. ءبىراق قازىر وكىنبەيمىن. سول جاقتا قالعان انام مەن ءسىڭىلىمدى ويلايمىن. ولاردىڭ كۇنى نە بولماق، سونى ۋايىمدايمىن» ، - دەدى سالتانات.

«جۋسان» دەپ ايدارلانعان شارا بەيكۇنا بالالاردى اداستىرماۋ ءۇشىن قاجەت. جۇرتتا جىراقتا قالدىرماۋ ءۇشىن قاجەت. ولار قازىر جازعىرۋدان گورى جاناشىرلىققا مۇقتاج. سالتاناتتىڭ العا قويعان ماقسات ارماندارى بار. وڭالتۋ شارالارى اياقتالعان سوڭ وقۋىن جالعاستىرعىسى كەلەدى.