قازاق كينوسىنىڭ بەلەسى: 11 وتاندىق فيلم حالىقارالىق فەستيۆالدەردە جۇلدە الدى
ناتيجەسىندە 11 وتاندىق فيلم ءتۇرلى ماراپاتتاردىڭ يەسى اتاندى، دەپ حابارلايدى قازاقپارات ءتىلشىسى «rruh.kz» اقپارات كوزىنە سىلتەمە جاساپ.
بەلگىلى بولىپ وتىرعانداي، وسى جىلدىڭ اقپان ايىندا شەتەلدەگى قانداستاردىڭ ءومىرىن كورسەتكەن «ورالمان» فيلمى نەپالداعى 22- حالىقارالىق كينوفەستيۆالدە «ۇزدىك حالىقارالىق كوركەم فيلم» جۇلدەسىنىڭ يەگەرى بولدى. سونداي- اق بۇل تۋىندى قىرعىزستاندىق «اق ءىلبىس» بايگەسىنىڭ ەكى باعىتى بويىنشا جۇلدەگەر اتاندى. اتاپ ايتقاندا، فيلمدەگى باستى ءرولدى سومداعان دۋلىعا اقمولدا «ۇزدىك اكتەر» دەپ تانىلدى. سونداي- اق كينوتۋىندى «ورتالىق ازياداعى ۇزدىك فيلم» اتاعىن يەلەندى.
وسىدان كەيىن ناۋرىز ايىندا اقان ساتايەۆ تۇسىرگەن «اناعا اپارار جول» فيلمى نيۋ- يورك قالاسىندا وتكەن «WeLink» حالىقارالىق كينوفەستيۆالىندە «ۇزدىك كوركەم فيلم» اتالىمىندا جەڭىمپاز بولدى. اتالعان فيلم انالىق ماحابباتتى، ەرلىكتى، ازاماتتىقتى، وتانسۇيگىشتىكتى، رۋحتىڭ جوعارىلىعىن ناسيحاتتايدى.
سول سەكىلدى ءساۋىر ايىندا ۆەنەرا قايىرجانوۆانىڭ «تىعىلماق» فيلمى V حالىقارالىق كونكۋرس- فەستيۆالىندە دىبىستىق الەۋەتىنىڭ جوعارى بولعانى ءۇشىن گريگوري ياكوۆليەۆيچ فرانك اتىنداعى ارنايى جۇلدەمەن ماراپاتتالدى.
ايتا كەتۋ كەرەك، اتالعان فيلمنىڭ دىبىسىن «ىنتوناتسي» ستۋدياسىنىڭ ستۋدەنت- رەجيسسەرلەرى ازىرلەگەن. كينودا ەرەسەكتەر شابۋىلىنىڭ قۇربانى بولعان قوس قۇربىنىڭ تاريحى باياندالادى.
ادامداردىڭ ءبىرىن- ءبىرى باعالاۋىنان، ءبىرىن- ءبىرى سىيلاۋىنان، قۇرمەت پەن ىزگىلىك سىندى قاسيەتتەردى بويعا جيناۋدان اسقان ماڭىزدى ەشتەڭە جوق ەكەنىن كورسەتۋگە تىرىسقان سەرىك ابىشيەۆ پەن رۋسلان ماگومادوۆتىڭ «ءبىر كۇنى بالالار ۇيىندە» اتتى كينوكارتيناسى رەسەيدە وتكەن «سۆەت ميرۋ» حالىقارالىق كينوفەستيۆالىندە باس جۇلدە يەلەندى.
سونداي- اق بەلگىلى رەجيسسەر تالعات تەمەنوۆ تۇسىرگەن «قالامىزدىڭ كىشكەنتاي حانزاداسى» اتتى فيلمدە باستى رولدەردىڭ ءبىرىن سومداعان تولەۋبەك ارالبايەۆ «ۇزدىك ەر ادام ءرولى» ءۇشىن ماراپاتتالدى. بۇل جۇلدە ارتىسكە تسينداو قالاسىندا وتكەن شىۇ ەلدەرىنىڭ حالىقارالىق كينوفەستيۆالىندە تابىستالدى. فيلمدە تاعدىرلارى ۇقساس قوس ادام كورسەتىلگەن. ءبىرىنشىسى، بالالار ۇيىندە تاربيەلەنىپ جاتقان التى جاسار بالا بولسا، ەكىنشىسى - ومىرلىك تاجىريبەسى مول قارتتار ۇيىندە ءومىر ءسۇرىپ جاتقان اقساقال. سيۋجەت بويىنشا ەكى اكتەر ءبىر- بىرىمەن كەزدەيسوق جولىعىپ قالادى. كينونىڭ جەلىسى ءارى قاراي ەكەۋىنىڭ سۇحباتى رەتىندە، ءوز ومىرلەرىن ەسكە الىپ سىرلاسقان اڭگىمەلەرى بويىنشا جالعاسادى.
10 - ناۋرىز كۇنى ستوكگولم قالاسىندا شۆەتسياداعى قازاقستاندىق جاستار قاۋىمداستىعى مەن شاكەن ايمانوۆ اتىنداعى «قازاقفيلم» ا ق- نىڭ بىرلەسۋى ارقىلى جانە شۆەتسياداعى قازاقستان ەلشىلىگىنىڭ ۇيىمداستىرۋىمەن قازاقستاندىق فيلمدەردىڭ كورسەتىلىمى بولدى. ەۋروپالىق كورەرمەندەر نازارىنا وتاندىق كينەماتوگرافيا ونىمدەرىنەن «شال» ، «جاۋجۇرەك مىڭ بالا» سەكىلدى فيلمدەر ۇسىنىلعان ەدى.
ال 2-5 - مامىر ارالىعىندا ومان سۇلتاندىعىنىڭ ماسكات قالاسىنداعى «VOX Shatti Cinema» كينوتەاترىندا قازاقستاندىق كينوتۋىندىلاردىڭ اپتالىعى ءوتتى. كولەمدى شارا اقان ساتايەۆ تۇسىرگەن «اناعا اپارار جول» اتتى كوركەم فيلمنىڭ كورسەتىلىمىمەن باستالدى. ال اپتالىقتىڭ سوڭعى كۇنىندە كورەمەندەر نازارىنا رۇستەم ابدىراشيەۆتىڭ «الماس قىلىش» تۋىندىسى ۇسىنىلدى.
سونىمەن قاتار، ۇستىمىزدەگى جىلدىڭ مامىر ايىندا يتاليا جانە ەستونيا مەملەكەتتەرىندە قازاقستاندىق كينو كۇنى اتالىپ ءوتتى. ايتا كەتۋ كەرەك، ءدال وسىنداي شارالاردى جىل سوڭىنا دەيىن تايلاند كورولدىگىندە، چەحيادا، سلوۆاكيادا، رۋمىنيادا جانە باسقا دا ەلدەردە وتكىزۋ جوسپارلانۋدا.
ەسكە سالساق، 5 - ءساۋىر كۇنى امىرە قاشاۋبايەۆتىڭ 1925 -جىلى پاريج قالاسىندا جەتكەن تۇعىرلى جەڭىسى تۋرالى سۋرەتتەيتىن، گولليۆۋدتىق كومپانيامەن بىرىگىپ تۇسىرىلگەن «امىرە» فيلمىنىڭ تۇساۋكەسەرى ءساتتى ءوتتى. اتالعان فيلم وتە جوعارى كاسىبي دەڭگەيدە ءتۇسىرىلىپ، تاجىريبەلى ماماندار قولىمەن وڭدەلگەن. بۇل كينوتۋىندى دا كورەرمەندەردىڭ ەرەكشە ىقىلاسىنا بولەندى دەپ ابدەن ايتۋعا بولادى.
الداعى ۋاقىتتا الەمدىك ساتىلىمعا، كورەرمەندەر نازارىنا قازاقستاندىق- قىتايلىق ۇجىمداردىڭ بىرلەسە جاساعان جۇمىسى «كومپوزيتور» كارتيناسى جارىققا شىقپاق. اتالعان تۋىندىدا ەكىنشى دۇنيەجۇزىلىك سوعىس جىلدارى ءبىزدىڭ ەلدە ءومىر سۇرگەن اتاقتى قىتايلىق كومپوزيتور سي سينحاي جانە ونىڭ باقىتجان بايقاداموۆپەن دوستىعى تۋرالى سۋرەتتەلەدى.
وسى جىلدىڭ سوڭىنا دەيىن «بالۋان شولاق» فيلمى جانە «كۇلتەگىن» ، «مۇزبالاق» انيماتسيالىق تۋىندىلارى كورەرمەن نازارىنا ۇسىنىلماق.
