پاۆلودارلىق 11 شەنەۋنىك الەۋمەتتىك جەلىدەگى سۋرەتتەرى ءۇشىن جاۋاپقا تارتىلدى
بۇل تۋرالى بۇگىن وڭىرلىك كوممۋنيكاتسيالار قىزمەتىندە وتكەن باسپا ءسوز جيىنىندا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى پاۆلودار وبلىسى بويىنشا دەپارتامەنتىنىڭ باسشىسى ادىلبەك مۇقاشيەۆ ايتتى.
- مەملەكەتتىك قىزمەتشىلەردىڭ الەۋمەتتىك جەلىدەگى پاراقشالارىن تەكسەرۋ بارىسىندا 200 ورىنسىز سۋرەت انىقتالدى، - دەيدى ادىلبەك مۇقاشيەۆ. - كوپتەگەن جاعدايدا ولار قىمبات كولىكتىڭ قاسىندا جانە كوڭىل كوتەرۋ ورىندارىندا تۇسكەن. سونىمەن قاتار ق ر ي س م تەحنيكالىق رەتتەۋ جانە مەترولوگيا كوميتەتىنىڭ قىزمەتكەرى - مەملەكەتتىك باقىلاۋدى ساراپتاۋ جانە مونيتورينگ باسقارماسىنىڭ باس ساراپشىسى ءوزىنىڭ ۆكونتاكتە الەۋمەتتىك جەلىسىندە دورەكى تۇردە بىلاپىت سوزدەرمەن پىكىر قالدىرعان.
سپيكەردىڭ ايتۋىنشا، مەملەكەتتىك قىزمەت جانە جەمقورلىققا قارسى زاڭنامانى ساقتاۋ سالاسى بويىنشا وتكەن جىلى 198 شاعىم تۇسكەن. ونىڭ باسىم بولىگى كونكۋرستى وتكىزۋ، لاۋازىمدىق مىندەتتەردى ءتيىستى دەڭگەيدە ورىنداماعانى ءۇشىن تارتىپتىك ءوندىرىس سالۋ، شاعىمداردى قاراۋ ءتارتىبىن بۇزۋ جانە ىسكەرلىك ەتيكەتتى ساقتاماۋعا قاتىستى.
وسىعان بايلانىستى جۇرگىزىلگەن 66 تەكسەرىستىڭ ناتيجەسىندە 550 زاڭبۇزۋشىلىق انىقتالعان. ولقىلىقتاردى جويۋ ءۇشىن 33 ۇسىنىم ەنگىزىلىپ، 142 ادامنىڭ قۇقىعى قالىپقا كەلتىرىلگەن جانە 77 مەملەكەتتىك قىزمەتشى تارتىپتىك جاۋاپكەرشىلىككە تارتىلعان.
- ماسەلەن، دەنساۋلىق ساقتاۋ باسقارماسىنىڭ ماماندارى مەن وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسى باس مامانىنىڭ وتىنىشىنە سايكەس مەرزىمنەن تىس، مەرەكەلىك جانە دەمالىس كۇندەرى اتقارعان جۇمىسى ءۇشىن وتەماقى تولەمەۋ، زاڭسىز تارتىپتىك جاۋاپكەرشىلىككە تارتۋ بويىنشا تەكسەرىس جۇرگىزىلگەن. ناتيجەسىندە اتالعان فاكتىلەر راستالدى جانە ولاردىڭ قۇقىقتارى قالىپقا كەلتىرىلدى، - دەيدى ادىلبەك مۇقاشەۆ.
