ساۋد ارابياسىندا ۇستالعان 11 حانزادا «حان سارايىندا» قاماۋدا وتىر - كەسكىن

استانا. قازاقپارات - سىبايلاس جەمقورلىق جاسادى دەپ وتكەن جەكسەنبىدە ۇستالعان ساۋد ارابياسىنىڭ حانزادالارى، شەنەۋنىكتەرى جانە مينيسترلەرىنىڭ قاماۋدا قانداي جاعدايدا وتىرعانى تۇسىرىلگەن ۆيدەو ينتەرنەتتى شارلاپ كەتتى.

The New York Times گازەتىنىڭ حابارلاۋىنشا، ودان كورولدىكتىڭ بەدەلدى تۇلعالارى سالتاناتتى «ريتتس كارلتون» قوناق ءۇيىنىڭ كەڭ سارايىندا كىلەم ورانىپ ۇيىقتاپ جاتقانى كورىنەدى. قوناق ءۇيدىڭ ۆەب-سايتى دۇيسەنبى كۇنى «كۇتپەگەن جاعدايلارعا بايلانىستى قوناق ءۇيدىڭ ينتەرنەت جانە تەلەفون جەلىلەرى ۋاقىتشا ءۇزىلدى» دەپ جازدى.

ەسكە سالا كەتەيىك، 4- قاراشادا ساۋد ارابياسىنىڭ كورولى شىعارعان جارلىقپەن باسقارۋشى بيلىكتە وتىرعان وتباسىلاردىڭ 11 حانزاداسى قاماۋعا الىنعان بولاتىن. حانزادا مۋحاممەد بەن سالمان باسقاراتىن سىبايلاس جەمقورلىقپەن كۇرەس جونىندەگى كوميتەت سىبايلاس جەمقورلىققا قاتىسى بار جوعارى بيلىكتە وتىرعانداردى تۇتقىنداۋ، شوتتارى مەن اكتيۆتەرىن بۇعاتتاۋ، ولاردى تەرگەپ-تەكسەرۋ جۇمىستارىن باستاپ كەتتى.

كۇدىكتىلەر اراسىندا كورول سالماننىڭ جيەنى، ميللياردەر ءال-ۆاليد يبن ءتالال حانزادا دا بار.