جامبىل شەنەۋنىكتەرى 11 مىڭ گەكتار ورماننىڭ جانىپ كەتكەنى ءۇشىن جازاعا تارتىلدى

تاراز. قازاقپارات - جامبىل وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىندا مەملەكەتتىك ورمان قورىنىڭ اۋماعىنداعى ءورت قاۋپى بار كەزەڭنىڭ الدىن الا قورىتىندىلارى تالقىلاندى، دەپ حابارلايدى «قازاقپارات» ح ا ا ءتىلشىسى.

«جامبىل وبلىسى جەر كولەمىنىڭ %30,8 ىن مەملەكەتتىك ورمان قورىنىڭ اۋماعى الىپ جاتىر، بۇل 4,4 ميلليون گەكتار دەگەن ءسوز»، - دەيدى باسقارما باسشىسى سەرىك قويباقوۆ. ونىڭ مالىمەتتەرىنە قاراعاندا، ورتكە قارسى شارالارعا بيىل وبلىستىق بيۋدجەتتەن 48,1 ميلليون تەڭگە بولىنگەن. «ءساۋىر ايىنان ورمان قورىنىڭ 3,2 ميلليون گەكتارى اۋەدەن باقىلانىپ وتىردى. مەملەكەتتىك ورمان قورىنىڭ اۋماعىندا 50 ورتكە قارسى كۇرەس توبى جاساقتالىپ، وعان 400 دەن استام ادام جۇمىلدىرىلدى»، - دەيدى باسقارما باسشىسى.

جامبىل وبلىسىنداعى مەملەكەتتىك ورمان قورى اۋماعىندا جىل باسىنان بەرى ءتورت ءىرى ورمان ءورتى بولىپ، 11,2 مىڭ گەكتار القاپتى قامتىعان. «ورمان ءورتىنىڭ تۋىنداۋىنا جول بەرگەنى ءۇشىن قوسقۇدىق، جۇلىن، بايزاق جانە مويىنقۇم مەملەكەتتىك مەكەمەلەرىنىڭ ديرەكتورلارىنا سوگىس جاريالاندى»، - دەپ مالىمدەدى جامبىل وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى سەرىك قويباقوۆ.