فرانسيادان قازاقستانعا 11 ميلليون دوللاردىڭ ءيىس سۋى جەتكىزىلگەن

الماتى. قازاقپارات - 8- ناۋرىز - حالىقارالىق ايەلدەر كۇنى مەرەكەسىندە ەڭ كوپ تارتۋ ەتىلەتىن سىيلىقتىڭ ءبىرى ءيىس سۋ.

قازاقپارات ساۋالىنا جاۋاپ بەرگەن ق ر ۇلتتىق ەكونوميكا مينيسترلىگى ستاتيستيكا كوميتەتى قازاقستانعا شەتەلدەن كەلەتىن كوسمەتيكا تۋرالى مالىمەتتەردى ۇسىندى. ستاتيستيكا مالىمەتىنە سۇيەنسەك، بۇل سالا بويىنشا قازاقستان نارىعىن فرانسيا مەن رەسەي تاۋارلارى جاۋلاپ العان.

2016-جىلى فرانسيادان 11,7 ميلليون دوللارعا ءيىس سۋلار ساتىپ الىنىپ، جەتكىزىلگەن. رەسەيدەن 11,3 ميلليون دوللار بولسا، ا ق ش- تان 3 ميلليون دوللاردىڭ تاۋارى الىنعان.

ەگەر 2015-جىلمەن سالىستىرساق، ول جىلى فرانسيادان 13 ميلليون دوللارعا، رەسەيدەن 9,7 ميلليون دوللارعا كوسمەتيكا بۇيىمدارى الىنعان.

ودان كەيىنگى ورىندا شۆەتسيا، پولشا، تۇركيا، يتاليا، يسپانيا ەلدەرى تۇر. بۇل ەلدەردىڭ ءارقايسىسىنان 1 ميلليون دوللاردىڭ ءيىس سۋلارى جەتكىزىلگەن. بۇل سالادا قىتايدىڭ ۇلەسى تومەن.

قازاقستاندىقتار 860 مىڭ دوللارعا عانا قىتاي اتىرلەرىن العان. ايتا كەتەيىك، قازاقستانعا ءيىس سۋلار نيدەرلاندى، جاپونيا، مەكسيكا، ب ا ءا سىندى ەلدەردەن دە جەتكىزىلەدى. ەرىندى بوياپ، تۇزەۋگە قاجەت دۇنيەلەر بويىنشا 2016-جىلى رەسەي تاۋارلارى كوش باستاپ تۇر.

ناقتىراق ايتقاندا، رەسەيدەن 2,8 ميلليون دوللارعا وسى سالادا تاۋارلار الىنسا، پولشادان 1,2 ميلليون دوللارعا، فرانسيادان 870 مىڭ دوللارعا تاۋار الىنعان.

بۇل جەردە قىتاي تاۋارلارىنا سۇرانىس از بولىپ تۇر، اتالعان ەلدەن قازاقستاندىقتار 550 مىڭ دوللاردىڭ تاۋارىن العان. ال، كوزگە ارنالعان بوياۋ، ارلەۋ زاتتارى جاعىنان دا رەسەي تاۋارلارى قازاقستانعا كوپ تاسىمالدانعان.

2016-جىلدىڭ قورىتىندىسى بويىنشا، رەسەيدەن ايەلدەردىڭ كوز كۇتىمى ءۇشىن قاجەتتى 3,4 ميلليون دوللاردىڭ تاۋارى الىنعان. ال 2015-جىلى بۇل تاۋارلاردىڭ قۇنى 1,3 ميلليون بولعان. رەسەيدەن كەيىن قىتاي مەن پولشا تاۋارلارلى العاشقى ساتىلاردان كورىنەدى.

بۇل ەلدەردەن 1,4 ميلليون جانە 1,1 ميلليون دوللاردىڭ تاۋارى ساتىپ الىنعان. بۇل ونىمدەر ا ق ش، فرانسيا، بەلارۋس، سيريا، پاكىستاننان دا جەتكىزىلەدى. بەتكە جاعاتىن وپا-دالاپتىڭ (پۋدرا) ەڭ كوبى دە رەسەيدەن الىنادى.

2016-جىلى قازاقستاندىق قىز-كەلىنشەكتەر ءۇشىن رەسەيدەن 600 مىڭ دوللارعا وپا-دالاپ اكەلىنگەن. سونىمەن قاتار، يتاليادان 550 مىڭ دوللاردىڭ تاۋارى جەتكىزىلسە، يرلانديادان 200 مىڭ دوللارعا كوسمەتيكا الىنعان. ال قىتاي مەن فرانسيادان 530 جانە 320 مىڭ دوللاردىڭ تاۋارى ساتىپ الىنعان.

الماس مۇقاش ۇلى