بالقاشتىق لاڭكەستەر 11 كەلى جارىلعىش زات دايىنداعان

قاراعاندى. قازاقپارات - قاراعاندى وبلىسىندا لاڭكەستەردى دايىنداۋ تۋرالى قىلمىستىق ىستە فيگۋرانتتاردىڭ ءبىرى تەرگەۋگە جاردەمدەستى.

بۇل تۋرالى «قازاقپارات» ح ا ا تىلشىسىنە ادۆوكات عالىم نۇرپەيىسوۆ حابارلادى.

«مەنىڭ قورعاۋىمداعى ەرلان ۇسەنوۆ قاتىسۋشى ەكەنىن مويىندادى. باسىنان باستاپ ول ۇسىنىسقا كۇدىكپەن قاراعان. ۇستالعان ساتتەن باستاپ تەرگەۋمەن ىنتىماقتاسا جۇمىس ىستەپ، جاردەمدەستى. سوندىقتان تەرگەۋ ۋاقىتىندا پروتسەسسۋالدىق كەلىسىمگە كەلدىك»، - دەدى نۇرپەيىسوۆ.

ونىڭ ايتۋىنشا، قورعالۋشى پروتسەسسۋالدىق كەلىسىمنىڭ بارلىق شارتتارىن ورىنداعان. «ول قۇپيا ورىندا ساقتالعان بارلىق جارىلعىش زاتتاردى كورسەتتى، ايعاقتى دالەل بەردى. تەرگەۋگە بەلسەندى كومەك كورسەتتى. پروتسەسسۋالدىق كەلىسىمدە جازانى جەڭىلدەتۋ شاراسىن قابىلداۋدى كورسەتتىك»، - دەدى ادۆوكات.

ونىڭ ايتۋىنشا، جاسىرىن ورىندا 11 كەلى جارىلعىش زات بولعان. قىلمىستىق ءىستىڭ باسقا ەگجەي-تەگجەيىن ادۆوكات اشپادى. «بۇل قىلمىستىق ءىستىڭ ماتەريالدارى، ءالى دە زەردەلەنەدى»، - دەپ اتاپ ءوتتى ول. ادۆوكات لاڭكەستىك توپتى قۇرۋعا نە يتەرمەلەگەنىن انىقتاۋ قاجەت ەكەنىن ايتتى. «ءبىز بۇل جاعدايعا نە تۇرتكى بولعانىن انىقتايتىنىمىزعا سەنەمىن. مۇنداي وقيعا اقتوبەدە دە، الماتىدا دا ورىن الدى. ەڭ باستىسى، بولعان وقيعاعا نە سەبەپ بولعانىن انىقتاۋ»، - دەپ اتاپ ءوتتى نۇرپەيىسوۆ.