02:34, 13 - قازان 2016 | GMT +5
باتىس قازاقستان تۇرعىنى كيىكتىڭ ءمۇيىزى ءۇشىن 11 ميلليون تەڭگە ايىپپۇل تولەيتىن بولدى
ورال. قازاقپارات - قازتالوۆ اۋداندىق سوتىنىڭ 11 -قازان كۇنگى ۇكىمىمەن م. دەگەن تۇرعىن ق ر ق ك 339-بابىنا سايكەس ايىپتى دەپ تانىلىپ، ول 1,6 جىلعا باس بوستاندىعىنان شەكتەلدى.
وعان قوسا ب ق و ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ تالاپ- ارىزى تولىقتاي قاناعاتتاندىرىلىپ، اتالعان ازاماتتان مەملەكەت پايداسىنا 11 ميلليوننان استام تەڭگە ءوندىرىلدى.
سوت تالقىسىندا بەلگىلى بولعانىنداي، م. جانىبەك اۋدانى جاقسىباي اۋىلىنا قاراستى «بوگەت قىستاعى» ماڭىنان پاكەتكە سالىنعان 26 دانا كيىك ءمۇيىزىن تاۋىپ الىپ، وزىمەن بىرگە قازتالوۆ اۋدانى قوشانكول اۋىلىنا الىپ كەلىپ، زاڭسىز ساقتاعان. سودان كەيىن ونى ساتىپ، پايدا تابۋ ماقساتىندا Subaru Legacy اۆتوكولىگىمەن ورالعا شىققان بەتتە اۋداندىق ىشكى ىستەر ءبولىمى قىزمەتكەرلەرىنىڭ قولىنا تۇسكەن.
سوت ۇكىمى زاڭدى كۇشىنە ەنگەن جوق.
ەسكە سالا كەتەيىك، قازىرگى كەزدە وسى سوتتا كيىكتى زاڭسىز اۋلاعانداردىڭ ءىسىن قاراۋ جالعاسۋدا.
