اقتوبە وبلىسىندا جىلقىنىڭ 11 پايىزى اسىل تۇقىمدى
جىلقىسىنىڭ اسىل تۇقىمدىسى 11 پايىزعا جەتەتىن اقتوبەدەن باسقا بىردە-ءبىر وبلىس جوق. اقتوبەنىڭ جىلقىلارىنا قازاقستان بويىنشا سۇرانىس جوعارى. بۇگىندە وڭىردە 13 اسىل تۇقىمدى جىلقى شارۋاشىلىعى جۇمىس جاسايدى.
بۇل تۋرالى بۇگىن جىلقى شارۋاشىلىعىن دامىتۋ ءۇشىن قۇرىلعان رەسپۋبليكالىق پالاتانىڭ العاشقى وتىرىسىندا ايتىلدى. العاشقى وتىرىس اقتوبەدە ءوتتى. ەلىمىزدىڭ تۇپكىر-تۇپكىرىنەن كەلگەن عالىمدار، جىلقى شارۋاشىلىعى سالاسىنىڭ ماماندارى مەن شارۋا قوجالىقتارىنىڭ يەلەرى اقتوبە وبلىسىندا جىلقى ءوسىرۋ، تۇقىمىن اسىلداندىرۋ ءىسىن وركەندەتۋگە مۇمكىندىك مول دەپ باعالاپ وتىر.
جۋىردا عانا قۇرىلعان پالاتا جىلقى شارۋاشىلىعىن دامىتىپ قانا قويماي، جىلقىشىلاردىڭ قۇقىعىن دا قورعايدى. جالپى، جىلقى شارۋاشىلىعىن دامىتۋعا قاتىستى قوردالانعان سۇراقتار كوپ. جىلقىشىنىڭ جەتىسپەۋى دە وزەكتى ماسەلەگە اينالىپ وتىر.
- بۇل رەسپۋبليكالىق پالاتا جىلقىنىڭ سانىن كوبەيتىپ، ساپاسىن ارتتىرۋعا، ءونىمىن تانىمال ەتۋگە جۇمىس ىستەۋى كەرەك. بۇل جەردە جىلقى ۇرلىعىن توقتاتۋ، جايىلىمى ءۇشىن جەر بەرۋ ماسەلەلەرى دە كۇن تارتىبىنە قويىلۋى مىندەتتى، - دەيدى رەسپۋبليكالىق «قامبار اتا» جىلقى وسىرۋشىلەر اسسوتسياتسياسىنىڭ پرەزيدەنتى ءنابيدوللا كيكەبايەۆ.
بۇگىندە ەلىمىزدە ەكى ميلليونعا جۋىق جىلقى بولسا، ونىڭ توقسان مىڭى اقتوبە وبلىسىندا ەكەن. «ەلىمىزدە ءىرى قارانى كوبەيتۋگە ارنالعان ءتۇرلى مەملەكەتتىك باعدارلامالار بار. وعان مەملەكەت ارنايى سۋبسيديا بەرىپ وتىر. ال، جىلقى باققان ادامعا قولداۋ جوقتىڭ قاسى. سۋبسيديا ساتىپ الۋشىعا ەمەس، ساتۋشىعا، ياعني جىلقى شارۋاشىلىعىمەن اينالىسىپ وتىرعان ادامعا بەرىلۋ كەرەك»، - اقتوبە تاجىريبە ستانساسى جىلقى شارۋاشىلىعى ءبولىمىنىڭ مەڭگەرۋشىسى سەرىكباي رزابايەۆ.