قازىعۇرتتىق 11جاسار مۇحامەدالى «ەرلىگى ءۇشىن» مەدالىمەن ماراپاتتالدى
ەسكە سالا كەتسەك، جەتكىنشەك ءساۋىر ايىندا قازىعۇرت اۋدانىندا وزەنگە اعىپ كەتكەن 3 جاسار قىزدى قۇتقارىپ، العاشقى كومەك كورسەتكەن بولاتىن.
ءوزى وقيتىن مەكتەپ ۇجىمى وقۋشىلار الدىندا ماقتاپ، ماراپاتتادى. باتىل وقۋشىعا مەكتەپ ديرەكتورى العىس حات تابىستادى.
وقيعا 1 -ءساۋىر كۇنى بولعان. ءتۇنى بويى جاۋعان نوسەردەن كەيىن التىنتوبە اۋىلدى وكرۋگىنە قاراستى قوساعاش اۋىلى ماڭىنداعى شاعىن قارجان وزەنى كۇرت تاسىعان. ويناپ جۇرگەن بالالاردىڭ اراسىنداعى 3 جاسار اقبىلەك سەرىكباي سۋعا قۇلاپ كەتەدى.
بۇل ۋاقىتتا وسى ماڭعا جاقىن جەردە ون جاسار مۇحامەدالى مەن اكەسى مال باعىپ جۇرگەن ەكەن. اكەسى الىسقا ۇزاپ كەتكەن مالدى قايىرۋعا كەتكەندە مۇحامەدالى بالالاردىڭ شۋ ەتە قالعان داۋسىن ەستيدى. قاراسا، كىشكەنتاي قىز تاسىعان سۋمەن بىرگە اعىپ بارا جاتىر.
«ۇلىم دەرەۋ جۇگىرىپ بارىپ، كورشىنىڭ قىزىن قۇتقارىپ قالدى. سودان كەيىن شالقاسىنان جاتقىزىپ، كەۋدەسىن باسقان كۇنى سۋىن شىعارعان. دەمى توقتاپ قالعان قىزعا جاساندى جولمەن تىنىس الۋىنا كومەكتەسىپتى. كەيىن مۇنىڭ ءبارىن قايدان بىلەسىڭ دەپ سۇراساق، مەكتەپتە مۇعالىمدەرى العاشقى كومەك كورسەتۋدى ۇيرەتكەنىن ايتتى. سودان كەيىن يۋتيۋبتان ءوزى ىزدەپ، قۇتقارۋ ءادىسىن كورىپ العان. مەن ءوز ۇلىمدى ماقتان تۇتامىن!» دەيدى ونىڭ اكەسى اعىمان سمانوۆ.
وسىلايشا وقۋشى ءوز ءومىرىن قاتەرگە تىگىپ، كىشكەنتاي قىزدى امان الىپ قالعان. بۇگىنگى كۇننىڭ جاس باتىرى بولاشاقتا قۇتقارۋشى بولۋدى ارماندايدى. مۇحامەدالىگە كوپتەن كۇتكەن مەدالىن وبلىستىق توتەنشە جاعداي دەپارتامەنتىنىڭ باسشىسى الەكساندر پۋتەيكو تاپسىرىپ، قۇتقارۋشىلار قاتارىنا قوسىلۋعا ۇسىنىس تا جاسادى، دەپ حابارلايدى otyrar.kz.