جۇرەگىڭىز اۋىرماسىن دەسەڭىز: قان اينالىمىن جاقسارتۋدىڭ 11 جولى

نۇر- سۇلتان. قازاقپارات - ەگەر قان اينالىمىندا قانداي دا ءبىر ولقىلىقتار بولسا، ونى اڭعارۋ قيىن ەمەس.

قان قىسىمىنىڭ جوعارلاۋى، شارشاۋ، كەز كەلگەن اۋا رايىندا اياق- قولدىڭ توڭۋى، باس اۋرۋى - مۇنىڭ بارلىعى قان اينالىمىنداعى وزگەرىستەن حابار بەرەدى. ال قاننىڭ دۇرىس اينالماۋى جۇرەك جۇمىسىنا اۋىرتپالىق تۇسىرەتىنى تۇسىنىكتى.

ەندەشە قان اينالىمىن جاقسارتۋ جولدارىمەن تانىس بولىڭىز.

1. تاعام دامدەۋىشتەرىن كوبىرەك قولدانىڭىز. قىزىل، قارا بۇرىشتار، گۇلشەتەن (روزمارين)، جەبىرشوپ (تيميان)، دارشىن (كوريسا)، سونداي- اق سارىمساقتىڭ دا قان اينالىمىن ارتتىراتىن كۇشى بار.

2. ساتىمەن كوتەرىلۋگە كوبىمىز ەرىنگەننەن جەدەل ساتىنىڭ (ليفت) كومەگىنە جۇگىنەمىز. ال ۆاريكوزدىڭ الدىن الىپ، جۇرەك بۇلشىقەتىن جاتتىقتىرۋدا ساتىمەن كوتەرىلۋدىڭ ورنى بولەك ەكەنىنە ءمان بەرمەيمىز.

3. ەگەر كومپيۋتەر الدىندا ۇزاق وتىراتىن بولساڭىز، اراسىندا تۇرىپ، دەنە جاتتىعۋلارىن جاساپ تۇرۋ قاجەتتىگىن ۇمىتپاڭىز. ۇزاق ۋاقىت قوزعالىسسىز وتىرۋ، وتتەكتىڭ جەتىسپەۋشىلىگى قاننىڭ ۇيۋىنا سەبەپ بولادى.

4. تەمەكىدەن باس تارتۋ كەرەك. ويتكەنى ونىڭ قۇرامىنداعى نيكوتين اعزاداعى س دارۋمەنىن سىرتقا شىعارىپ قانا قويماي، سونىمەن قاتار جۇرەك جۇمىسىنا كەرى اسەرىن تيگىزەدى.

5. ماسساج قان اينالىمىن جاقسارتادى. ماسساج جاساعاننان كەيىن دەنەمىزدىڭ بوساڭسۋى - قان اينالىمىنىڭ دۇرىستالعانىنىڭ كورسەتكىشى.

6. دۇرىس دەمالۋدىڭ دا ماڭىزى مول. اياعىڭىزدى باس دەڭگەيىنەن بيىكتەۋ، ياعني اياقتى ءسال كوتەرىپ، 15 مينۋت جاتۋدىڭ ءوزى قان اينالىمىنىڭ جاقسارۋىنا كوپ سەبەپ بولادى. كەشكە جۇمىستان شارشاپ كەلگەندە اياعىڭىزدى كوتەرىپ ازداپ جاتۋدى ادەتكە اينالدىرىڭىز.

7. اسقاباق، كۇنباعىس دانەگى، قۇرما، مەيلىنشە كوبىرەك جەمىس- جيدەكتەر قولدانۋعا تىرىسىڭىز. سونىمەن قاتار قان اينالىمىن رەتكە كەلتىرۋدە قارا شوكولادتىڭ دا الار ورنى ەرەكشە.

8. سالقىن سۋعا ءتۇسۋ بويدى سەرگىتىپ، قان اينالىمىن جاقسارتادى. ىستىق ۆاننادان كەيىن سالقىن دۋش قابىلداي وتىرىپ، ءينسۋلتتىڭ بولۋ مۇمكىندىگىن 30 پايىزعا ازايتۋعا بولادى ەكەن.

9. كوبىرەك قوزعالىستا بولۋدىڭ ءمانى زور. قوزعالىس، سالاۋاتتى ءومىر سالتىن ۇستانۋ - قان اينالىمىن جاقسارتۋدىڭ بىردەن- ءبىر جولى. تابيعاتتا جاياۋ سەرۋەندەپ، تازا اۋدا كوبىرەك جۇرگەن دۇرىس.

10. اياقكيىمنىڭ ىڭعايلى بولۋى وتە ماڭىزدى. مۇمكىن بولسا، مەيلىنشە كوبىرەك جالاڭاياق جۇرگەن دۇرىس.

11. كۇندەلىكتى جىلى سۋ ءىشۋدى ادەتكە اينالدىرىڭىز. ونىڭ جۇرەگىڭىزگە پايداسى مول. ال سۋىق سۋ قان تامىرلارىن تارىلتادى.

anabol.kz