يتاليادا 11 جىل بۇرىن ستاديوندا جوعالىپ كەتكەن جانكۇيەر تابىلدى
بۇل تۋرالى eurosport.ru عا سىلتەمە جاساعان egemen.kz حابارلادى.
2004 -جىلى رولف بەنتل ەسىمدى 71 جاستاعى جانكۇيەر دوستارىمەن بىرگە سۇيىكتى كومانداسى - «بازەلگە» قولداۋ ءبىلدىرۋ ءۇشىن شۆەيساريادان يتالياعا ارنايى كەلگەن. ول كەزدە بازەلدىكتەر جەرگىلىكتى «ينتەرمەن» چەمپيوندار ليگاسىنىڭ ىرىكتەۋ سىنىندا كەزدەسكەن بولاتىن. ماتچتىڭ اياقتالۋىنا 5 مينۋت قالعان كەزدە رولف اجەتحاناعا شىعىپ كەتەدى. ال قايتىپ كەلگەن كەزدە جولداستارىن تابا الماي قالعان. ستاديوننان شىققاننان كەيىن دە جەرلەستەرىن كەزدەستىرمەگەن ول امالسىزدان ميلاندا قالۋعا ءماجبۇر بولعان. سەبەبى، ول كەزدە جانكۇيەردە حابارلاساتىن تەلەفونى بولماعان. ءتىپتى قالتاسىندا نەبارى 20 ەۋرو عانا بولعان ەكەن. بۇل ارينە، شۆەيسارياعا قايتۋعا جەتكىلىكسىز ەكەنى تۇسىنىكتى.
وسىلايشا، تاعدىر تالكەگىنە امالسىز كونگەن شۆەيساريالىق ازامات ميلانداعى شاعىن اۋدانداردىڭ ءبىرىن پانالاۋعا ءماجبۇر بولادى. العاشىندا وعان جەرگىلىكتى ستۋدەنتتەر كومەك قولىن سوزىپ، تاماق جانە جىلى كيىمدەرمەن قامتاماسىز ەتىپ تۇرعان. كەيىن ءوزى از-كەم يتاليان ءتىلىن ۇيرەنىپ، قۇرىلىس نىساندارىنىڭ بىرىنە جۇمىسقا ورنالاسقان.
وسى جىلدىڭ باسىندا ر. بەنتل توبىعىن سىندىرىپ الىپ، دارىگەردىڭ كومەگىنە جۇگىنەدى. سول كەزدە اۋرۋحانا قىزمەتكەرلەرى ونىڭ يتاليا ازاماتى ەمەس ەكەنىن جانە بۇل ەلدە ەشقانداي ساقتاندىرۋى جوقتىعىن بىلەدى. ناتيجەسىندە ولار شۆەيساريا بيلىگىنە حابارلاسىپ، ءمان-جايدى تۇسىندىرەدى. ءسويتىپ جانكۇيەردىڭ تۋعان ەلىنە ورالۋىنا سەپتىگىن تيگىزەدى.
بۇگىندە جاسى 80 نەن اسقان شۆەيساريالىقتىڭ تاعدىرعا ەش وكپەسى جوق. ءتىپتى ب ا ق وكىلدەرىنە بەرگەن سۇحباتىندا: «ميلاندا ءومىر ءسۇرۋدىڭ قانشالىقتى جانعا جايلى ەكەنىن سەزىنۋ ءۇشىن ماعان وسى ون جىل ۋاقىت جەتكىلىكتى بولدى»، - دەگەن.
ايتا كەتەيىك، جوعارىدا اتالعان ويىندا «ينتەر» 4:1 ەسەبىمەن جەڭىسكە جەتتى. ال رولف بەنتل يتاليادا تۇرعان 10 جىلدان استام ۋاقىت ىشىندە ونىڭ سۇيىكتى كومانداسى 8 مارتە شۆەيتساريا چەمپيوناتىندا توپ جارعان.
